لاہور: ماڈل و اداکارہ صرحا اصغر نے کہا ہے کہ ز سوشل میڈیا کے ذریعے ولاگرز معاشرے میں ایک غلط سوچ کو پروان چڑھا رہے ہیں، جیسے وہ اپنے لائف پارٹنر کو بہت بڑا گلدستہ دیتے ہیں، جو کہ کوئی عام شخص نہیں دے سکتا، ولاگرز کو اپنے ولاگز میں ایسی چیزیں دکھانی چاہئیں جن پر یقین کرنا آسان ہو، کیونکہ ایسا حقیقی زندگی میں بہت کم ہوتا ہے اور ہر کوئی ایسا کر بھی نہیں سکتا ، یہ لوگوں کو حقیقت سے دور کر رہا ہے۔
ایک پوڈکاسٹ میں گفتگو کرتے ہوئے انہوںنے کہا ثنا یوسف واقعے کے بعد والدین کو اپنی آنکھیں کھول لینی چاہئیں اور بچوں کو اتنی کم عمری میں سوشل میڈیا استعمال کرنے کی اجازت نہیں دینی چاہیے، کیونکہ جب بچے کم عمری میں سوشل میڈیا استعمال کرتے ہیں تو انہیں یہ شعور نہیں ہوتا کہ کون ان سے مخلص ہے اور کون نہیں۔
ان کے مطابق والدین کو چاہیے کہ وہ اس عمر میں بچوں سے اپنا تعلق مضبوط بنائیں، اگر تعلق مضبوط ہوگا تو بچے اپنی ہر بات والدین سے شیئر کریں گے۔ انہوں نے کہا کہ وہ ثنا یوسف کے قتل میں میں کسی ایک فریق کو ذمے دار نہیں ٹھہرا سکتیں کیونکہ انہیں اصل صورتحال کا علم نہیں کہ ان دونوں کے درمیان کیا تعلق تھا، اس لیے وہ ذمے داری سوشل میڈیا پر عائد کرتی ہیں۔
