لاہور: وزیراعلی پنجاب مریم نواز نے مثالی گاؤں منصوبے کی جلد از جلد تکمیل کیلئے ڈیڈ لائن طلب کرتے ہوئے منصوبے میں عوامی ضروریات کو مدنظر رکھ کر ترجیحات کے تعین کی ہدایت کردی۔
ہفتے کو وزیراعلی پنجاب کی زیر صدارت اجلاس کا انعقاد ہوا جس میں مثالی گاؤں، ستھرا پنجاب اور ویسٹ ٹو ویلیو پراجیکٹس پر بریفنگ دی گئی۔اجلاس میں پنجاب میں 1200دیہات مثالی گاؤں بنانے کے پراجیکٹ پر پیشرفت کا جائزہ لیا گیا، منصوبے کے تحت ہر مثالی گاؤں میں 24/7 واٹر سپلائی، مکمل سیوریج نیٹ ورک اور ویسٹ مینجمنٹ ٹریٹمنٹ پلانٹ بنیں گے۔
مثالی گاؤں منصوبے میں پختہ گلیاں، سڑکوں کی بحالی، چلڈرن پارک اور شجرکاری بھی ہوگی، گھروں پر نمبر لگانے کے ساتھ ساتھ سائن بورڈز بھی نصب کئے جائینگے۔ اجلاس میں مثالی گاؤں کیلئے سولر سسٹم سے چلنے والے واٹر سپلائی ماڈل اور سیوریج سسٹم پر بھی بریفنگ دی گئی۔
اجلاس کو بتایا گیا کہ مثالی گاؤں پراجیکٹ کے تحت پائلٹ فیز کے 130دیہات میں ترقیاتی منصوبے مکمل کر کئے گئے ہیں۔
اس موقع پر وزیراعلی نے مثالی گاؤں منصوبے کی جلد از جلد تکمیل کیلئے ڈیڈ لائن طلب کرتے ہوئے کہا کہ منصوبے میں عوام کی ضروریات کو مدنظر رکھ کر ترجیحات کا تعین کیا جائے اور ہر گاؤں کو ترقی یافتہ بنایا جائے۔
