کراچی: وزیراطلاعات سندھ شرجیل میمن نے اے پی این ایس کو اخباری صنعت کے جائز مسائل ترجیحی بنیادوں پر حل کرنے کی یقین دہانی کرا دی۔
ذرائع کے مطابق شرجیل میمن سے صدر اے پی این ایس سرمدعلی اور سیکرٹری جنرل محمد اطہر قاضی نے ملاقات کی اور اخباری صنعت کو درپیش مسائل سے آگاہ کیا۔ وفد نے پرنٹ میڈیا کے حجم میں اضافے، علاقائی و لسانی پریس کی اہمیت پر زور دیا۔
اس موقع پر گفتگو کرتے ہوئے شرجیل میمن نے کہا کہ سندھ حکومت آزادی صحافت اور اخبارات کے کردار کی معترف ہے، پرنٹ میڈیا معاشرے میں شعور اجاگر کرنے اور جعلی خبروں کے خلاف عوام کو درست معلومات فراہم کرنے میں کلیدی حیثیت رکھتا ہے۔
انہوں نے کہا کہ حکومت سندھ اخباری صنعت کے جائز مسائل کو ترجیحی بنیادوں پر حل کرے گی، صنعت کو درپیش مسائل کے حل کیلئے متعلقہ محکموں کو ہدایات جاری کریں گے ۔
