اسلام آباد: وفاقی وزیر منصوبہ بندی احسن اقبال نے ترقی یافتہ ممالک سے ماحولیاتی وعدے پورے کرنے کا مطالبہ کرتے ہوئے کہا ہے کہ متاثرہ ممالک کے لیے 100 ارب ڈالر سالانہ کی فراہمی خیرات نہیں، ماحولیاتی انصاف کا تقاضا ہے، موسمیاتی تبدیلی سے متاثرہ ممالک ماحولیاتی انصاف کیلئے عالمی طاقتوں سے ‘ڈو مور’ کا تقاضا کرتے ہیں۔
اسلام آباد میں موسمیاتی تبدیلی کے موضوع پر تقریب سے خطاب میں احسن اقبال نے کہا کہ گلیشیئرز کا پگھلاو دریائے سندھ کے آبی نظام کو سنگین خطرے سے دوچار کررہا ہے، پاکستان میں گلیشیئرز کی پگھلنے کی شرح 60 برسوں میں بلند ترین سطح پر ہے۔ انہوںنے کہا موسمیاتی تبدیلی کوئی مفروضہ نہیں، یہ ایک خوفناک حقیقت بن چکی ہے۔
