لاہور: پی ڈی ایم اے پنجاب نے مختلف علاقوں میں موسلادھار بارشوں کے پیش نظر الرٹ جاری کرتے ہوئے عوام کو احتیاطی تدابیر اختیار کرنے، بارشوں کے دوران غیر ضروری سفر سے گریز کرنے کی ہدایت کردی۔
جاری بیان میں ترجمان نے بتایا کہ گزشتہ 24 گھنٹوں کے دوران راولپنڈی میں 54ملی میٹر، مری میں 42ملی میٹر اور نارووال میں 62ملی میٹر بارش ریکارڈ کی گئی، اسی طرح جہلم، سیالکوٹ، منگلا، اٹک، گجرات اور رحیم یار خان میں بھی بارشوں کا سلسلہ جاری رہا۔ ترجمان کے مطابق صوبے بھر میں بارشوں کی شدت کے پیش نظر تمام ضلعی ایمرجنسی آپریشن سینٹرز اور صوبائی کنٹرول روم کو مکمل طور پر الرٹ کر دیا گیا ہے۔
ترجمان کے مطابق راولپنڈی، فیصل آباد، گوجرانوالہ، سرگودھا، ملتان، ساہیوال، بہاولپور، جہلم، اٹک، چکوال، مری، گلیات، میانوالی، نارووال، گجرات، سیالکوٹ، ٹوبہ ٹیک سنگھ، منڈی بہاالدین اور ڈی جی خان میں تیز بارشوں کی پیش گوئی کی گئی ہے۔
ترجمان کے مطابق 25 جولائی تک جاری رہنے والی بارشوں کے باعث نشیبی علاقوں ،ندی نالوں میں طغیانی اور مری کے پہاڑی علاقوں میں لینڈ سلائیڈنگ کا خطرہ ہے۔ ترجمان نے عوام سے درخواست کی ہے کہ وہ احتیاطی تدابیر اختیار کریں اور بارشوں کے دوران غیر ضروری سفر سے گریز کریں۔
