اسلام آباد: وفاقی وزیر داخلہ محسن نقوی نے کشمیریوں کی حمایت جاری رکھنے کا اعادہ کرتے ہوئے کہا ہے کہ یوم الحاق پاکستان عالمی برادری کیلئے آئینہ ہے جس میں اسے اپنی خاموشی، بے حسی اور دوہرے معیار کا چہرہ صاف دکھائی دینا چاہئے، کشمیریوں کی قربانیاں امانت ہیں جن کا قرض صرف آزادی ہے، جلد بھارت کو کشمیریوں کے جائز حق کے سامنے سر تسلیم خم کرنا پڑے گا۔
یوم الحاق پاکستان پر جاری بیان میں محسن نقوی نے کہا کہ یوم الحاق پاکستان تاریخ کی وہ روشن صبح ہے جب اہل کشمیر نے ڈوگرہ راج کے جبر کو مسترد کر کے پاکستان کو اپنی سیاسی اور روحانی منزل قرار دیا، 19 جولائی 1947ء کو کشمیریوں نے ایک ایسا فیصلہ کیا جو وقت کی گرد، ظلم کی دھند اور بندوقوں کی گونج میں بھی نہ مٹ سکا۔
انہوں نے کہا کہ قائداعظم محمد علی جناح کا فرمان کہ ‘کشمیر پاکستان کی شہ رگ ہے آج بھی ہمارے قومی شعور کا مرکز ہے، کشمیر کی فضاؤں میں آج بھی وہی صدائے یقین گونج رہی ہے جسے 1947ء کے غیر مسلح مگر غیور کشمیریوں نے بلند کیا تھا۔
انہوں نے کہا کہ بھارتی ریاست کا فوجی جبر، کالے قوانین اور انسانی حقوق کی پامالی کشمیریوں کی وفا کو توڑ سکے نہ جھکا سکے، یوم الحاق پاکستان پر شہدا کو سلام پیش کرتے ہیں جنہوں نے پاکستان سے نظریاتی نسبت کو زندگی سے عزیز تر جانا۔ انہوں نے کہا کہ اقوام متحدہ کی قراردادیں آج بھی منتظر ہیں کہ عالمی ضمیر جاگے اور کشمیریوں کو ان کا جائز حق خودارادیت دیا جائے۔ انہوں نے کہا کہ حریت رہنماؤں کو جیلوں میں ڈال کر، زبانوں کو بند کر کے اور قبریں کھود کر بھی بھارت کشمیریوں کے دل سے پاکستان نہیں نکال سکا۔
وزیر داخلہ نے کہا کہ یوم الحاق پاکستان عالمی برادری کیلئے آئینہ ہے جس میں اسے اپنی خاموشی، بے حسی اور دوہرے معیار کا چہرہ صاف دکھائی دینا چاہئے۔ انہوںنے کہا کہ یوم الحاق پاکستان تجدید عہد کا دن ہے کہ کشمیریوں کی قربانیاں ہم سب پر امانت ہیں جن کا قرض صرف آزادی ہے۔
انہوں نے کہا کہ کشمیریوں کی تحریک آزادی میں پاکستان اپنے بھائیوں کی سفارتی، اخلاقی اور سیاسی حمایت جاری رکھے گا، انشااللہ وہ لمحہ دور نہیں جب بھارت کو کشمیریوں کے جائز حق کے سامنے سر تسلیم خم کرنا پڑے گا۔
