اسلام آباد: وزیراعظم شہباز شریف نے دانش سکولز و یونیورسٹی میں جدید کلاس رومز پر سرمایہ کاری اور ڈیجیٹل تعلیم پر توجہ مرکوز کرنے کی ہدایت کرتے ہوئے کہا ہے کہ بطور خادم پاکستان قوم کے بچوں کو عالمی معیار کی تعلیم و تربیت اولین ذمہ داری سمجھتا ہوں، دانش سکولز سے فارغ التحصیل طلباء دنیا میں اپنی صلاحیتوں کو لوہا منوا رہے ہیں، ہر طبقے کو اعلی تعلیم و تربیت کے یکساں مواقع کی فراہمی کیلئے ہمیشہ کوشاں رہوں گا۔
منگل کو وزیر اعظم شہباز شریف کی زیر صدارت ملک بھر میں دانش سکولز اور اسلام آباد میں دانش سکولز یونیورسٹی کی تعمیر بارے پیشرفت پر جائزہ اجلاس آج کا انعقاد ہوا جس میں وفاقی وزراء احسن اقبال، اعظم نذیر تارڑ، احد خان چیمہ، خالد مقبول صدیقی، چیئرمین وزیرِ اعظم یوتھ پروگرام رانا مشہود احمد خان، چیف کوارڈنیٹر مشرف زیدی، متعلقہ اعلی حکام نے شرکت کی جبکہ چاروں صوبوں بشمول گلگت بلتستان اور آزاد کشمیر کے چیف سیکریٹریز و نمائندے ویڈیو لنک کے ذریعے اجلاس میں شریک ہوئے۔
اجلاس کو بتایا گیا کہ کری اسلام آباد میں دانش سکول کی تعمیر پر کام تیزی سے جاری ہے جس کو راوں برس کے اختتام تک مکمل کر لیا جائیگا، گلگت بلتستان میں سلطان آباد، گھانچے اور استور میں دانش سکولز کی تعمیر پر بھی کام تیزی سے جاری ہے جن پر کام آئندہ برس مکمل کر لیا جائے گا۔
اجلاس کو بتایا گیا کہ آزاد کشمیر میں باغ اور بھمبر میں دانش سکولز پر کام شروع ہوچکا جبکہ شاردہ، نیلم میں دانش سکول کا پی سی ون منظور ہوچکا جلد ہی تعمیری کام شروع کر دیا جائے گا۔
اجلاس کو بتایا گیا کہ بلوچستان میں سبی، موسی خیل، ژوب، قلعہ سیف اللہ اور ڈیرہ بگٹی میں دانش سکولز کا پی سی ون منظور ہو چکا جبکہ حب میں دانش سکولز کی تعمیر کی فیزیبلٹی پر کام جاری ہے۔ اجلاس کو آگاہ کیا گیا کہ چترال، کراچی اور ٹنڈو محمد خان میں دانش سکولز کی تعمیر کیلئے زمین کا انتخاب ہو چکا ہے جبکہ انکی فیزیبلٹی اور دیگر اقدمات پر کام تیزی سے جاری ہے۔
شرکاء کو ایبٹ آباد اور وزیرستان میں دانش کی تعمیر کی تجاویز اور راجن پور میں یونیورسٹی کے حوالے سے پیشرفت سے بھی آگاہ کیا گیا۔ اجلاس کو بتایا گیا کہ دانش یونیورسٹی کی ٹیکنو فیزیبلٹی پر کام تیزی سے جاری ہے جسے جولائی کے اختتام تک مکمل کر لیا جائے گا جبکہ ماسٹرپلان، ڈیزائن اور تعمیر کیلئے 12 بین الاقوامی فرمز میں سے 7 درکار معیار پر پوری اتری ہیں، پرکیورمنٹ کمیٹی اس کو حتمی شکل دے رہی ہے۔ شرکاء کو آگاہ کیا گیا کہ عالمی معیار کے ڈگری پروگرامز، داخلوں کی تفصیلات اور الائیڈ سہولیات بھی حتمی مراحل میں ہیں۔
اس موقع پر وزیر اعظم نے ہدایت کی کہ دانش سکولز اور دانش یونیورسٹی کی تعمیر میں ڈیجیٹل اور جدید کلاس رومز پر زیادہ سرمایہ کاری کی جائے اور عالمی معیار کے جدید علوم کی تعلیم پر توجہ مرکوز کی جائے۔ انہوں نے کہا کہ بطور خادم پاکستان قوم کے بچوں کو بین الاقوامی معیار کی تعلیم و تربیت اپنی اولین ذمہ داری سمجھتا ہوں۔ انہوں نے کہا کہ دانش سکولز میں اساتذہ کو بہترین پیکیج فراہم کیا جائے،اساتذہ اور سٹاف کی بھرتیوں میں شفافیت اور میرٹ کو مرکزی اہمیت دی جائے۔
وزیراعظم نے ہدایت کی کہ آزاد کشمیر اور گلگت بلتستان میں دانش سکولز کی تعمیر پر کام کو تیز کیا جائے۔وزیراعظم نے کہا کہ اللہ کے فضل و کرم سے پنجاب میں دانش سکولز کی صورت جو پودا لگایا تھا وہ تناور درخت بن چکا ہے، غریب و متوسط طبقے کے سینکڑوں طلباء دانش سکولز سے فارغ التحصیل ہوکر دنیا بھر میں اپنی صلاحیتوں کو لوہا منوا رہے ہیں۔
انہوں نے کہا کہ دانش سکولز سے معاشی طور پر کمزور طبقے کے بچوں کی خدمت کا جو خواب دیکھا، اللہ کے بے پایاں فضل سے وہ شرمندہ تعبیر ہو رہا ہے۔ انہوں نے کہا کہ ہر طبقے کو اعلی تعلیم و تربیت کے یکساں مواقع کی فراہمی کیلئے ہمیشہ کوشاں رہوں گا۔
