سوات: خیبر پختونخوا کے مشیر اطلاعات بیرسٹر محمد علی سیف نے کہا ہے کہ دہشت گردی کے خلاف جنگ میں وفاق اور صوبہ ایک پیج پر نہیں، وفاق دہشت گردی کے خلاف مالی اور ٹیکنیکل سپورٹ نہیں دے رہا، دہشت گرد صوبائی حکومت نہیں ریاست کے خلاف لڑ رہے ہیں۔
سوات سے جاری کیے گئے اپنے بیان میں انہوں نے کہا ہے کہ دہشت گردی کا خاتمہ مذاکرات سے ہی ممکن ہے، پی ٹی آئی کو دیوار سے لگانے سے ترامیم ہی ترامیم ہوں گی۔
بیرسٹر محمد علی سیف نے کہا یہ جو چاہے کر لیں، ہماری حکومت ختم نہیں ہو گی، صوبائی حکومت کے خلاف مولانا فضل الرحمن کا بیان مضحکہ خیز ہے، مولانا فضل الرحمن اپنی پارٹی میں تبدیلی لے کر آئیں، سانحہ سوات کی پیش کردہ رپورٹ پر بھرپور کارروائی ہو گی۔
بیرسٹر سیف نے کہا کہ ہمارے کارکنوں کو بلا وجہ گرفتار کیا گیا اور سزائیں دی گئیں، دہشت گردی ایک سیاسی اور انتظامی مسئلہ ہے۔ بیرسٹر سیف نے کہا کہ مخصوص نشستیں دیگر پارٹیوں کو دینا عوام کے حق پر ڈاکا ہے، میں اسٹبلشمنٹ کا نہیں پی ٹی آئی کا بندہ ہوں، ہم ہر محاذ پر ان مخصوص نشستوں کی مخالفت کریں گے۔
