اسلام آباد: وفاقی وزیر منصوبہ بندی احسن اقبال نے کہا ہے کہ خبر کی تصدیق کو بڑا چیلنج قرر دیتے ہوئے کہا ہے کہ ڈیجیٹل دور میں جھوٹی خبروں کا پھیلاؤ جمہوریت، معاشرتی ہم آہنگی کیلئے سنگین خطرہ ہے، میڈیا لٹریسی کیلئے قومی چارٹر تشکیل دے رہے ہیں۔
جاری بیان کے مطابق ادارہ فروغ قومی زبان اسلام آباد میں یونیسکو کے زیر اہتمام منعقدہ ”میڈیا اور انفارمیشن لٹریسی فریم ورک پالیسی ڈائیلاگ” سے خطاب کرتے ہوئے احسن اقبال نے کہا کہ موجودہ دور میں جمہوریت کیلئے سب سے بڑا خطرہ ٹیکنالوجی اور انفارمیشن کا امتزاج ہے، اگر امریکہ جیسے ترقی یافتہ ملک میں صدارتی انتخاب فیک انفارمیشن سے متاثر ہو سکتا ہے تو یہ ہمارے لئے لمحہ فکریہ ہے۔
انہوں نے کہا کہ ڈیجیٹل دور میں جنگوں کا سب سے موثر ہتھیار جھوٹی خبریں ہیں، ہر ملک کیلئے میڈیا اور انفارمیشن لٹریسی دفاع کی پہلی لائن ہونی چاہئے۔
وفاقی وزیر نے فیک نیوز کے پھیلاؤکو معاشرتی ہم آہنگی کیلئے بھی سنگین خطرہ قرار دیتے ہوئے کہا کہ 2018ء میں 2سیاسی جماعتوں نے میرے خلاف سوشل میڈیا پر منظم نفرت انگیز مہم چلائی جس کے نتیجے میں ایک نوجوان نفرت میں اس قدر اندھا ہو گیا کہ اس نے مجھ پر قاتلانہ حملہ کیا۔
انہوں نے کہا کہ جو لوگ سوشل میڈیا کے ذریعے آزادانہ طور پر نفرت پھیلاتے ہیں ان کا انجام مثالی ہونا چاہئے تاکہ معاشرے کو مزید تقسیم سے بچایا جا سکے۔ انہوں نے کہا کہ حکومت میڈیا اور انفارمیشن لٹریسی کو ایک قومی چارٹر کی شکل دے رہی ہے تاکہ نوجوان نسل کو جھوٹ اور سچ میں فرق کرنا سکھایا جا سکے۔
انہوں نے کہا کہ میڈیا تنظیمیں متحد ہو کر ایک محتسب مقرر کریں تاکہ غیر ذمہ دارانہ اور جھوٹی خبروں کی اشاعت پر سخت احتساب ممکن بنایا جا سکے۔
انہوں نے تعلیمی اداروں میں بھی اساتذہ کو روایتی تدریسی طریقوں کی بجائے تنقیدی سوچ کو فروغ دینا چاہئے۔ انہوں نے کہا کہ یونیورسٹیوں میڈیا لٹریسی کورس کو ہر تعلیمی پروگرام کا لازمی جزو بنائیں۔
