بھارت نے سرکاری طور پر تسلیم کرلیا کہ رواں ماہ کے پہلے ہفتے میں پاکستان پر حملے کے دوران پاکستانی فضائیہ نے جنگی طیارے مار گرائے۔ چیف آف ڈیفنس جنرل انیل چوہان نے بلومبرگ سے گفتگو میں کہا کہ ہم نے طیارے کھوئے ہیں۔
بھارت نے پاکستان کے ہاتھوں جنگی طیارے گرائے جانے کو سرکاری طور پر تسلیم کرلیا۔
بھارت کے چیف آف ڈیفنس جنرل انیل چوہان نے بلومبرگ کو دیئے گئے انٹرویو میں کہا کہ پاکستان کیخلاف لڑائی میں ہم نے جنگی طیارے کھوئے ہیں۔
جنرل چوہان نے اقرار کیا کہ اہم یہ نہیں کہ وہ طیارے گرائے گئے، اہم یہ ہے کہ کیوں گرائے گئے۔
گرنے والے طیاروں کی تعداد سے متعلق سوال کا جواب دینے سے گریز کرتے ہوئے وہ بار بار لفظ ’’وہ‘‘ کا استعمال کرتے رہے۔ انہوں نے ساتھ ہی پاکستان کے 6 طیارے مار گرانے کے دعوے کو بھی "غلط” قرار دیا لیکن گرنے والے بھارتی طیاروں کے اعداد نہیں دیئے گئے۔
انٹرویو میں جنرل چوہان نے مزید کہا کہ ہم نے فضائی لڑائی کے دوران غلطیاں کیں، ہم نے اپنی غلطی پہچانی، دو دن بعد اصلاح کی۔
بھارتی جنرل نے بلومبرگ سے گفتگو میں امریکی ثالثی یا جوہری جنگ کے خطرے کو ’غیر حقیقی‘ قرار دیا۔
واضح رہے کہ 6 اور 7 مئی کی رات بھارت نے پہلگام حملے کو بنیاد بنا کر بغیر ثبوت کے پاکستان پر فضائی حملہ کیا تھا، جس پر پاک فضائیہ نے بھرپور جوابی کارروائی کرتے ہوئے ایک گھنٹے کے دوران ہی رافیل سمیت بھارت کے 5 لڑاکا طیارے مار گرائے تھے۔
اس حوالے سے بھارت کی جانب سے مسلسل جھوٹ بولا جاتا رہا اور جوابی الزام لگایا گیا کہ پاکستانی طیارے تباہ کیے ہیں تاہم پاک فوج کی جانب سے تکنیکی شواہد پیش کیے جانے کے بعد عالمی سطح پر پاکستان کے مؤقف کو تسلیم کیا گیا تھا۔
