امریکہ میں پاکستانی سفیر رضوان سعید شیخ نے کہا ہے کہ بھارتی قیادت کے بیانات ہندوتوا کی دہشت گردانہ سوچ کے عکاس، کشیدگی کو ہوا دے رہے ہیں،بلوچستان میں معصوم بچوں کے خون سے ہاتھ رنگنے والے دہشت گرد اور ان کے نظریاتی و مالیاتی سرپرست انسانیت کی بدترین مثال ہیں۔واشنگٹن میں میڈیا سے گفتگو کرتے ہوئے رضوان سعید شیخ نے کہا کہ پاک بھارت جنگ بندی میں امریکہ نے اہم کردار ادا کیا ہے،
صدر ٹرمپ کی جانب سے بذات خود جنگ بندی کا اعلان اس حوالے سے امریکی کردار کو واضح کرتا ہے۔انہوں نے کہا کہ ٹرمپ امن کے داعی ہیں، مسئلہ کشمیر کے حل میں پیشرفت بارے امریکی صدر کی کوششیں قابل قدر ہیں، امید ہے ان کوششوں کو جاری رکھتے ہوئے معاملے کو طے شدہ طریقہ کار کے مطابق پایہ تکمیل تک پہنچایا جائے گا۔ انہوں نے کہا کہ پاکستان اقوام متحدہ کی قراردادوں اور کشمیر ی عوام کی امنگوں کے مطابق مسئلے کا پائیدار اور مستقل حل کا خواہاں ہے۔ انہوں نے بتایا کہ سندھ طاس معاہدے کے حوالے سے بھارت کا رویہ لاقانونیت کے ایک تسلسل کا مظہر ہے،یکطرفہ طور پر معاہدے کو منقطع کرنے یا معطل کرنے کی کوئی شق یا گنجائش نہیں ۔انہوں نے کہا کہ عالمی برادری کسی کو بھی پانی کو ہتھیار کے طور پر استعمال کرنے کے غیر قانونی اور غیر انسانی عمل کی حمایت نہیں کرے گی، 25کروڑ کی آبادی کا پانی روکنا اعلان جنگ تصور کیا جائے گا۔ انہوںنے کہا کہ بھارتی قیادت کے بیانات ہندوتوا کی دہشت گردانہ سوچ کے عکاس، کشیدگی کو ہوا دے رہے ہیں ہیں۔
انہوں نے کہا کہ بھارتی پارلیمنٹ میں اکھنڈ بھارت کا نقشہ تسلط پسندانہ سوچ اور مذموم مقاصد کی نشاندہی کرتا ہے۔انہوں نے کہا کہ بلوچستان میں بھارت کا کردار کسی سے ڈھکا چھپا نہیں ہے، بلوچستان میں معصوم بچوں کے خون سے ہاتھ رنگنے والے دہشت گرد اور ان کے نظریاتی اور مالیاتی سرپرست انسانیت کی بدترین مثال ہیں۔انہوں نے کہا کہ بھارت میں نفرت کا بیانیہ انتخابی خساروں کی پردہ پوشی کے لیے فروغ دیا جا رہا ہے۔
