اسلام آباد ہائی کورٹ نے پی ٹی آئی رہنماء رئوف حسن کا نام ای سی ایل سے نکالنے کا حکم دیتے ہوئے بیرون ملک سفر کی اجازت کیلئے ٹرائل کورٹ سے رجوع کی ہدایت کردی ۔منگل کو اسلام آباد ہائیکورٹ میںجسٹس انعام امین منہاس نے رئوف حسن کا نام ای سی ایل سے نکالنے کی درخواست پر سماعت کی ۔ عدالت نے مختصر سماعت کے بعد رئوف حسن کی درخواست منظور کرتے ہوئے نام ای سی ایل سے نکالنے کا حکم دیا اور بیرون ملک سفر کی اجازت کیلئے ٹرائل کورٹ سے رجوع کی ہدایت کیان۔
عدالت نے ریمارکس دیئے کہ ٹرائل کورٹ رئوف حسن کی درخواست پر قانون کے مطابق جلد فیصلہ کرے، وکیل کے مطابق رئوف حسن کینسر کے مریض ہیں انہیںچیک اپ کیلئے برطانیہ جانا ہے۔عدالتی حکم میں کہا گیا کہ وکیل کے مطابق پٹیشنر پر ایف آئی اے کا مقدمہ ہے جس میں وہ ضمانت پر ہیں، وکیل نے دلائل دیئے ہیں کہ محض مقدمہ درج ہونے پر کسی کا نام ای سی ایل میں شامل کرنا بلا جواز ہے۔فیصلے کے مطابق عدالت کو بتایا گیا کہ ایف آئی اے نے 24جولائی 2024ء کو پٹیشنر کا نام پی سی ایل میں شامل کرنے کی سفارش کی ،ڈی جی امیگریشن اینڈ پاسپورٹس نے 26اگست 2024ء کو نام پی سی ایل میں شامل کر دیا، کریمنل کیس زیر التوا یا تفتیش جاری ہونا پٹیشنر کا نام پی سی ایل میں شامل کرنے کا جواز نہیں۔عدالتی فیصلے کے مطابق پٹیشنر اپنے خلاف درج مقدمہ میں ضمانت پر ہے اور ریاست نے ضمانت منسوخی دائر نہیں کی، وفاقی حکومت سے رئوف حسن پر سفری پابندیاں عائد کرنے کی منظوری نہیں لی گئی۔ پاسپورٹ رولز کے مطابق ملک میں داخلے اور روانگی کو ریگولیٹ کرنے کی اتھارٹی وفاقی حکومت کے پاس ہے۔
