بھارت کے زیر انتظام کشمیر کے شہر سری نگر میں حکام کی جانب سے نافذ کردہ بلیک آؤٹ کے دوران ایک عمارت کامنظر-(شِنہوا)
اسلام آباد(شِنہوا)پاکستان کی فوج نے ایک بیان میں کہا ہے کہ پاکستان نے بھارتی ریاست پنجاب کے ضلع جالندھر کے علاقے آدم پور میں بھارتی ایس 400 فضائی دفاعی نظام کو کامیابی سے نشانہ بناکر تباہ کردیا۔
پاک فوج کے شعبہ تعلقات عامہ (آئی ایس پی آر) کی جانب سےجاری بیان میں کہاگیا ہے کہ یہ حملہ جے ایف 17 طیارے سے ہائپر سونک میزائلوں کے ذریعے کیا گیا، جس میں ٹھیک نشانے پر لگنے والے گولہ بارود کے ذریعے جدید فضائی دفاعی تنصیب کو ناکارہ بنادیاگیا۔
بیان میں مزید کہا گیا ہے کہ ایس-400 سسٹم، جس کی قیمت کا تخمینہ تقریباً 1.5 ارب امریکی ڈالر ہے، کو زمین سے فضا میں مار کرنے والے بھارت کے جدید ترین میزائل نظاموں میں سے ایک سمجھا جاتا تھا۔
عسکری تجزیہ کاروں نے شِنہوا کو بتایا کہ ایس-400 کو کامیابی کے ساتھ نشانہ بنانے سے خطے میں بھارت کی فضائی دفاعی پوزیشن پر اہم اثرات مرتب ہوسکتے ہیں۔
آئی ایس پی آر کے مطابق یہ حملہ پاکستان کے بڑے فوجی آپریشن "بنیان مرصوص” کا ایک حصہ ہے جس کا مطلب سیسہ پلائی ہوئی دیوار ہے، جو مسلسل بھارتی اشتعال انگیزی کے جواب میں شروع کیا گیا اور اس کا مقصد بھارت بھر میں متعدد اہم فوجی تنصیبات کو نشانہ بنانا ہے۔
