چین کی شمالی تیانجن بلدیہ میں تیانجن بین الاقوامی کروز ہوم پورٹ پر غیر ملکی سیاح ایک اداکارہ کے ساتھ تصویر بنوارہی ہے-(شِنہوا)
بیجنگ(شِنہوا)چینی پورٹ شہروں پر یوم مئی کی تعطیلات کے دوران بین الاقوامی سیاحوں کی آمد میں غیر معمولی اضافہ دیکھا گیا جو منظم ویزا پالیسیوں اور داخلے و اخراج کی بہتر خدمات کی مرہون منت ہے۔
30 اپریل سے 3 مئی تک بیجنگ کے پورٹس پر غیر ملکی شہریوں کی آمدورفت 69 ہزار تک پہنچ گئی جو گزشتہ سال سے 52.1 فیصد زائد ہے۔ سیاحت، خاندانی دوروں اور کاروبار داخلے کی اہم وجوہات میں شامل ہیں۔
2 مئی کو پیرس سے بین الاقوامی مسافر بردار پرواز بیجنگ کیپیٹل انٹرنیشنل ایئر پورٹ پر اتری۔ ایک بزرگ جوڑا امیگریشن ہال میں کارروائیوں کے دوران ہچکچاہٹ محسوس کر رہا تھا جس پر کثیر لسانی امیگریشن افسر چھوئی ژو چھنگ نے فرانسیسی زبان میں ان کی مدد کی، متعلقہ پالیسیوں کی وضاحت کی اور ان کی کسٹمز کے مراحل کو آسانی سے مکمل کروایا۔
کیپیٹل اور داشنگ ہوائی اڈوں کی طرح بیجنگ کے اہم پورٹس پر چھوئی جیسے کثیر لسانی خدمات فراہم کرنے والے اہلکار ہر شفٹ میں 100 سے زائد مشاورت فراہم کرتے ہیں۔ اس کے علاوہ بزرگ، بیمار، معذور اور حاملہ مسافروں کے لئے خصوصی راستے مختص کئے گئے جبکہ ’ون سٹاپ‘ کاؤنٹرز قائم کئے گئے تاکہ عارضی داخلے کے اجازت نامے جاری کئے جاسکیں اور رسمی کارروائیاں موثر طریقے سے مکمل کی جا سکیں۔
چین کے جنوبی شہر گوانگ ژو میں یکم مئی سے 3 مئی تک ایک لاکھ 54 ہزار سے زائد سرحد پار مسافروں کی آمد و رفت ریکارڈ کی گئی جو گزشتہ سال سے 23 فیصد زیادہ ہے۔ شہر کے بائی یون امیگریشن چیک پوائنٹ کے افسر لِن شون یوئے نے کہا کہ ہمارے تمام 34 معائنہ راستے عروج کے اوقات میں مکمل طور پر فعال تھے تاکہ محفوظ اور موثر راہداری کو یقینی بنایا جا سکے۔
