چین کے شمالی صوبے ہیبے کے شہر بے دائی حہ کے ایک ہسپتال میں ڈاکٹر کان کن کے سینے کے ایکسرے فلم کی بنیاد پر مرض کی تشخیص کررہے ہیں-(شِنہوا)
بیجنگ(شِنہوا)چین بھر میں نیوموکونیوسس نامی پھیپھڑوں کی بیماری کے مریضوں کے لئے 900 سے زائد بحالی مراکز موجود ہیں جو ان قصبوں اور برادریوں میں مکمل علاج کو یقینی بناتے ہیں جہاں ان مریضوں کی اکثریت موجود ہے۔
قومی صحت کمیشن (این ایچ سی) کے ایک عہدیدار لی جون نے ایک پریس بریفنگ کے دوران بتایا کہ موجودہ ٹاؤن شپ مراکز صحت اور کمیونٹی ہیلتھ سروس سنٹرز سے منسلک ان مراکز نے نیوموکونیوسس کے 10 لاکھ سے زائد مریضوں کو روایتی چینی ادویات، جسمانی ورزش، نفسیاتی مشاورت اور غذائیت کو یکجا کرتے ہوئے قابل رسائی اور مفت خدمات فراہم کی ہیں۔
لی جون نے کہا کہ فی الحال نیوموکونیوسس ناقابل علاج ہے لیکن معیاری علاج اور بحالی کے ذریعے بیماری کو بڑھنے سے روکنا اور مریضوں کے معیار زندگی کو بہتر بنانا ممکن ہے۔
پیشے کے لحاظ سے بیماریوں کی درجہ بندی اور فہرست کے حوالے سے لی جون نے کہا کہ حالیہ برسوں میں کام کرنے کے ناقص طریقوں اور کام سے متعلق تناؤ، جسمانی اور نفسیاتی دونوں لحاظ سے پیدا ہونے والے صحت کے مسائل زیادہ نمایاں ہوگئے ہیں جس کی وجہ سے فہرست میں ترامیم کی گئی ہیں۔
این ایچ سی نے گزشتہ دسمبر میں پیشے کے لحاظ سے عضلاتی امراض اور ذہنی اور رویے کی خرابیوں کو فہرست میں شامل کیا جس سے یہ بڑی حد تک بین الاقوامی ادارہ محنت کے معیارات اور دنیا بھر کے بیشتر ممالک کے طریقوں کے مطابق ہوگیا ہے۔
لی جون نے کہاکہ پیشے کے لحاظ سے 12 اقسام کی 135 بیماریوں پر مشتمل درجہ بندی اورفہرست کا نیا ایڈیشن یکم اگست سے نافذ العمل ہوگا۔
