چین کے مشرقی صوبہ شان ڈونگ کے شہر چھنگ ڈاؤ میں گہرے سمندر میں آبی زراعت کا انٹیلیجنٹ جہاز بیہائی یارڈ کی بندرگاہ پر لنگرانداز ہے-(شِنہوا)
چھنگ ڈاؤ(شِنہوا)چین کے مشرقی بندرگاہی شہر چھنگ ڈاؤ میں آبی زراعت کا ایک لاکھ 50ہزار ٹن وزنی جہاز استعمال کے لئے فراہم کردیا گیا ہے۔
چھنگ ڈاؤ کونسن ڈویلپمنٹ (گروپ) کمپنی لمیٹڈ کی سرمایہ کاری سے بنایا گیا یہ جہاز ایک لاکھ 50ہزار ٹن وزن لے جانے کی صلاحیت رکھتا ہے۔ یہ 244.9 میٹر لمبا ہے اور اس میں 15 افزائشی کیبن ہیں جن میں تقریباً ایک لاکھ مکعب میٹر پانی ذخیرہ کرنے کی گنجائش ہے۔
اس جہاز میں تقریباً 61کروڑ یوآن (تقریباً 8کروڑ 46لاکھ امریکی ڈالر) کی سرمایہ کاری کی گئی ہے، جو چھنگ ڈاؤ کونسن کے استعمال کے لئے تیار کیا گیا ہے۔
جہاز پر نصب سمارٹ آبی پرورش کے نظام سے سالانہ 3600 ٹن اعلیٰ معیار کی مچھلی کی پیداوار کی توقع کی جا رہی ہے۔ ان افزائشی کیبنز کو بڑی پیلی کروکر اور سالمن جیسی مچھلیوں کی اقسام کی پرورش کے لئے استعمال کیا جا سکتا ہے۔
