اسلام آباد ہائیکورٹ نے بانی پی ٹی آئی عمران خان سے ہفتے میں دو دن ملاقات بحال کرانے کا حکم دیتے ہوئے صحافیوں سے گفتگو پر پابندی عائد کردی۔ پیر کو اسلا آباد ہائیکورٹ میںقائمقام چیف جسٹس سرفراز ڈوگر، جسٹس ارباب محمد طاہر اور جسٹس محمد اعظم پر مشتمل لارجر بینچ نے عمران خان کی جیل میں ملاقاتوں بارے دائر درخواست پر سماعت کی ۔
وکیل جیل سپرنٹنڈنٹ نے بتایا کہ جیل مینوئل کے مطابق عمران خان کی منگل کے روز ملاقاتیں کرا رہے ہیں، دسمبر تک اسی ایس او پیز کے تحت جیل ملاقاتیں کرائی جا رہی تھیں۔انہوں نے کہا کہ جنوری کے بعد اسٹیٹس تبدیل ہوا، بانی پی ٹی آئی کا اسٹیٹس انڈر ٹرائل قیدی سے سزا یافتہ قیدی بن گیا، سیکیورٹی تھریٹس بھی تھیں۔قائمقام چیف جسٹس نے ریمارکس دیئے ہر بندہ درخواست لے کر آ جاتا ہے کہ میری بھی جیل میں ملاقات کرائی جائے، ملاقات کے بعد میڈیا ٹاک کی کیا ضرورت ہے؟ ملاقات کر کے چلے جائیں۔
وکیل جیل سپرنٹنڈنٹ نے کہا یہ جیل ملاقاتوں کو سیاسی مقاصد کیلئے استعمال کرتے ہیں۔قائمقام چیف جسٹس نے کہا ان سے انڈر ٹیکنگ لے لیتے ہیں کہ جیل ملاقات کے بعد میڈیا ٹاک نہ کریں۔اسلام آباد ہائیکورٹ نے بانی پی ٹی آئی سے ملاقات کے بعد میڈیا ٹاک پر پابندی لگاتے ہوئے کہا کہ جو بھی عمران خان سے ملے گا وہ میڈیا ٹاک نہیں کرے گا۔بانی پی ٹی آئی کے کوآرڈنیٹرسلمان اکرم راجہ جو نام دیں گے صرف وہی ملاقات کر سکے گا۔جسٹس سرفراز ڈوگر نے ہدایت کی کہ بانی پی ٹی آئی کی بچوں سے ملاقات کیلئے ٹرائل کورٹ کو درخواست دیں۔بعد ازاں سماعت ملتوی کردی گئی۔
