سربراہ جے یو آئی مولانا فضل الرحمن نے کہا ہے کہ حکمرانوں نے کشمیریوں کے خون ،ناموس کو اپنی سیاست کیلئے استعمال کیا ،کشمیری عوام پر بھارتی مظالم تاریخ کا سیاہ ترین باب ہیں، عالمی طاقتیں ظلم پر کب بولیں گی؟،شہیدوں کا خون رائیگاں نہیں جائے گا۔
یوم یکجہتی کشمیر پر جاری بیان میں مولانا فضل الرحمن نے کہا کہ 7دہائیاں گزرنے کے باوجود اقوام متحدہ کی جانب سے 1948ء اور 1949ء کی قراردادوں پر عملدرآمد کیلئے کوئی ٹھوس اقدامات نہیں کئے گئے، اقوام متحدہ کی قرارداد پر عملدرآمد میں بھارت کا منفی رویہ اور ہٹ دھرمی رکاوٹ ہے، اقوام متحدہ کشمیر میں استصواب رائے کے حوالے سے اپنی ذمہ داریاں پوری کرنے میں ناکام رہا ہے،بھارت کے مظالم تاریخ کا سیاہ ترین باب ہیں،
عالمی طاقتیں بھارتی ظلم پر کب بولیں گی؟۔ انہوں نے کہا کہ ہمارے حکمرانوں نے کشمیریوں کے خون اور ناموس کو اپنی سیاست کیلئے استعمال کیا ہے۔انہوں نے کہا کہ آج کا دن ظلم کے خلاف جدوجہد، حق کی حمایت اور آزادی کی تحریک کا دن ہے،انصاف کے نام پر بنی اقوام متحدہ کشمیر کیلئے کب حرکت میں آئے گی؟ ۔ قائد جمعیت نے کہا کہ کشمیر کے شہیدوں کا خون رائیگاں نہیں جائے گا، عالمی برادری بھارت کے کشمیر پر غاصبانہ تسلط کا نوٹس لے۔
