یروشلم کے قریب اسرائیلی فوج کی اوفر جیل کے سامنے قیدیوں کو لے جانے والی بسیں کھڑی ہیں-(شِنہوا)
رملہ(شِنہوا)غزہ میں حماس کی قید سے رہائی کے بعد 3 اسرائیلی یرغمالیوں کی واپسی کے چند گھنٹے بعد اسرائیل نے مغربی کنارے میں رملہ کے مغرب میں واقع اوفر جیل سے 90 فلسطینی قیدیوں کا پہلا گروپ رہا کر دیا۔
عینی شاہدین اور مقامی فلسطینی ذرائع نے بتایا کہ ناموں کی فہرست کی تصدیق سے متعلق مسائل حل ہونے کے بعد متعدد بسیں مقامی وقت کے مطابق رات ایک بجے اوفر جیل سے روانہ ہوئیں۔
حماس سے وابستہ قیدیوں کے میڈیا آفس نے اس بات کی تصدیق کی ہے کہ فہرستوں پر معاہدہ طے پانے کے بعد رہائی کا عمل شروع کردیا گیا ہے۔
ایک بیان میں کہا گیا ہے کہ ریڈ کراس کی بین الاقوامی کمیٹی (آئی سی آر سی) کی بسوں نے مردوں اور خواتین قیدیوں کو اوفر جیل سے فلسطینی اتھارٹی کے زیر کنٹرول علاقوں تک پہنچایا۔
قیدیوں کے اہلخانہ سمیت سینکڑوں فلسطینی رہا ہونے والے قیدیوں کا استقبال کرنے کے لئے جیل کے قریب جمع ہوئے۔
جیل کے آس پاس کے علاقے میں اس وقت کشیدگی میں اضافہ ہوا جب اسرائیلی فورسز نے متعدد صحافیوں اور فلسطینی شہریوں پر حملہ کیا اور ہجوم کو منتشر کرنے کے لئے آنسو گیس کا استعمال کیا۔
رہائی پانے والے 90 قیدیوں میں مشرقی یروشلم سے تعلق رکھنے والی خواتین اور 18 سال سے کم عمر بچے شامل ہیں۔
قیدیوں کی رہائی اسرائیل اور حماس کے درمیان غزہ جنگ بندی کے معاہدے کا حصہ ہے جو اتوار کو نافذ العمل ہوا۔
