چین کے جنوب مغربی شی زانگ خود مختار علاقے کے شہر شی گازے کی ڈنگری کاؤنٹی کے چیمکو ٹاؤن شپ کے ایک گاؤں میں ایک خاتون اپنے بچے کو تھامے رضاکاروں کی طرف سے لائے گئے گرم کپڑے وصول کررہی ہے-(شِنہوا)
بیجنگ(شِنہوا)چین کی وزارت خزانہ نے شی زانگ خود مختار علاقے میں منگل کو آنے والے زلزلے کے نتیجے میں زرعی پیداواری تنصیبات کو نقصان پہنچنے کے بعد وہاں زرعی پیداوار کو سہارا دینے کے لئے 8کروڑ یوآن (تقریباً ایک 1.10کروڑ امریکی ڈالر) مختص کئے ہیں۔
وزارت نے اپنی ویب سائٹ پر ایک بیان میں کہا ہے کہ یہ فنڈز زلزلے سے زرعی تنصیبات، گرین ہاؤسز اور مویشی بانی کے شیڈز کو پہنچنے والے نقصان کے باعث مختص کئے گئے ہیں۔ بیان میں کہا گیا ہے کہ نقصانات میں مویشیوں کی اموات بھی شامل ہیں۔
بیان میں کہا گیا ہے کہ اس فنڈنگ سے شی زانگ کو زرعی پیداوار سے متعلق امدادی کاموں اور زلزلے سے تباہ ہونے والے مویشی بانی کی سہولیات کی بحالی میں مدد ملے گی۔
فنڈنگ سے متاثرہ علاقوں میں زرعی پیداوار کو جلد از جلد بحال کرنے اور نقصانات کو کم سے کم کرنے کی کوشش میں کیڑوں اور بیماریوں پر قابو پانے کے آلات، ایندھن، چارے اور دیگر سامان کی خریداری کے لئے سبسڈی بھی فراہم کی جائے گی۔
چین کے جنوب مغربی شی زانگ خودمختار علاقے کی ڈنگری کاؤنٹی میں منگل کی صبح 6.8 شدت کا زلزلہ آیا تھا جس کے نتیجے میں 126 افراد ہلاک اور 188 زخمی ہوئے تھے۔ زلزلے سے متاثرہ علاقے میں ٹیلی مواصلات، سڑکیں اور بجلی بحال کردی گئی ہے۔
