صدر آصف زر داری نے کہاہے کہ قومی یکجہتی ،ترقی کیلئے تمام شہریوں کے حقوق کی پاسداری ناگزیر ہے،ہمیں عدم برداشت ،امتیازی سلوک کی حوصلہ شکنی کرنا ،اس بات کو یقینی بنانا ہوگا پاکستان میں ہر شخص کا عزت و احترام کیا جائے اور وہ خود کو محفوظ تصور کرے۔
کرسمس کے موقع پر اپنے پیغام میں کہاکہ صدر آصف زرداری نے کہا کہ کرسمس کے پرمسرت موقع پر پاکستان اور دنیا بھر کی مسیحی برادری کو دلی مبارکباد پیش کرتا ہوں۔ انہوںنے کہاکہ کرسمس انسانیت کیلئے آفاقی پیغام لاتی ،تمام مذاہب کے ماننے والوں کو محبت، سخاوت، رحم، اتحاد اور امید کی ترغیب دلاتی ہے۔ انہوںنے کہاکہ کرسمس کا دن حضرت عیسیٰ علیہ السلام کی ولادت کی یاد میں منایا جاتاہے،
آپ کا محبت، ہمدردی اور امن کا پیغام آج بھی ہماری حوصلہ افزائی اور رہنمائی کر رہا ہے۔ انہوںنے کہاکہ یہ آفاقی پیغام ہمیں ایک جامع اور پرامن معاشرے کے قیام کیلئے کام کرنے کی ترغیب دیتا ہے۔ انہوں نے کہا کہ کرسمس کا تہوار ہمیں درس دیتا ہے کہ ضرورتمندوں سمیت ایک دوسرے کی طرف دوستی اور یکجہتی کا ہاتھ بڑھائیں۔ انہوںنے کہاکہ پاکستان کا آئین تمام شہریوں کو ان کے مذہب سے قطع نظربنیادی حقوق کی ضمانت اور عبادت کرنے ،اپنے عقائد کے مطابق زندگی گزارنے کی آزادی دیتا ہے۔
انہوںنے کہاکہ قائداعظم نے ایک ایسے پاکستان کا تصور دیا جہاں تمام مذاہب کے لوگ برابری کی بنیاد پر ترقی کر سکیں۔ انہوںنے کہاکہ قومی یکجہتی و ترقی کیلئے تمام شہریوں کے حقوق کی پاسداری ناگزیر ہے۔ انہوںنے کہاکہ آج کے دن ہم پاکستان کی ترقی میں مسیحی برادری کے کردار کا بھی اعتراف کرتے ہیں،انہوں نے تعلیم، صحت ، کمیونٹی سروس، سماجی بہبود، اور عوامی خدمت کے شعبے میں نمایاں خدمات انجام دیں ہیں۔
انہوںنے کہاکہ مسیحی برادری کا کردار ہماری قوم کے متنوع پن کا ثبوت ہے ،یہ امر تمام پاکستانیوں کیلئے باعث فخر ہے۔انہوںنے کہاکہ آئیے ، ہم مذہبی ہم آہنگی، احترام ِباہمی اور اقلیتوں کے حقوق کے تحفظ کے لیے عہد کی تجدید کریں۔ انہوںنے کہاکہ ہمیں عدم برداشت اور امتیازی سلوک کی حوصلہ شکنی کرنا ہوگی اور اس بات کو یقینی بنانا ہوگا کہ پاکستان میں ہر شخص کا عزت و احترام کیا جائے اور وہ خود کو محفوظ تصور کرے۔ انہوںنے کہاکہ دعا ہے یہ کرسمس ہماری مسیحی برادری کیلئے خوشی اور امید لے کر آئے۔
