چین کے مشرقی صوبے ژے جیانگ کے شہر ہانگ ژو کے علاقے فو یانگ میں صارفین ایک خزانچی کو اشیاء کے تبادلہ پروگرام کی سبسڈی کے لئے درخواست دے رہے ہیں۔(شِنہوا)
بیجنگ (شِنہوا) چین کے اعلیٰ اقتصادی منصوبہ ساز نے کہا ہے کہ رواں سال 10 کھرب یوآن (تقریباً 139 ارب امریکی ڈالر) کے انتہائی طویل المعیاد خصوصی ٹریژری بانڈز کے ذریعے جمع کردہ فنڈز مخصوص منصوبوں اور پروگراموں کے لئے مختص کئے گئے ہیں۔
قومی ترقی و اصلاحات کمیشن (این ڈی آر سی) کے مطابق 700 ارب یوآن اہم قومی حکمت عملیوں کے نفاذ اور اہم شعبوں میں سلامتی کی صلاحیت بڑھانے کے لیے مختص کئے گئے ہیں جبکہ 300 ارب یوآن سازوسامان کی اپ گریڈیشن اور اشیائے صرف کے تبادلہ پروگرام پر خرچ کئے جارہے ہیں۔
قومی ترقی و اصلاحات کمیشن نے ان منصوبوں کی فہرست بھی جاری کی ہے جن پر فنڈز خرچ کئے جارہے ہیں۔ ان میں دریائے یانگسی کے ساتھ ساتھ ریلوے ، شاہراہوں اور ہوائی اڈوں کی تعمیر ، شمال مشرقی علاقے میں اعلیٰ معیار کے کھیتوں کا قائم اور شمال مشرقی ، شمالی اور شمال مغربی خطوں میں شیلٹر بیلٹ پروگرام شامل ہیں۔
قومی ترقی و اصلاحات کمیشن نے نگرانی اور جانچ پڑتال بڑھانے کے لئے متعلقہ حکام کے ساتھ مل کر کام کرنے اور منصوبوں کی تعمیر جلد از جلد شروع کرنے کو یقینی بنانے کا عہد کیا ہے۔
رواں سال کی سرکاری کارکردگی رپورٹ کے مطابق چین رواں سال کے آغاز سے اگلے کئی سال تک ہر سال انتہائی طویل المعیاد خصوصی ٹریژری بانڈز جاری کرے گا جس میں رواں سال کے لئے 10 کھرب یوآن کا ہدف مقرر کیا گیا ہے۔
