سندھ ہائیکورٹ نے 3 مقدمات میں عارف علوی کی 20 روزہ حفاظتی ضمانت منظور کر لی۔بدھ کو سندھ ہائیکورٹ میں سابق صدر عارف علوی کی 3 مقدمات میں دائر حفاظتی ضمانت درخواستوں پر سماعت ہوئی ۔ وکیل درخواست گزار نے کہا کہ پرامن احتجاج کے باوجود مختلف دہشت گردی ایکٹ سمیت سنگین دفعات کے تحت مقدمات درج کئے گئے ہیں، اب تک کی معلومات کے مطابق عارف علوی کیخلاف میانوالی، ٹیکسلا اور راولپنڈی میں مقدمات درج کئے گئے ہیں۔
وکیل نے کہا کہ عارف علوی کیخلاف مقدمات کے اندراج کا مقصد سیاسی دبائو میں لانا ہے، متعلقہ عدالتوں سے رجوع کرنے کیلئے 20 دن کے لیے حفاظتی ضمانت دی جائے اور سندھ پولیس کو درخواست گزار کی گرفتاری ،نام نامعلوم ایف آئی آرز میں شامل کرنے سے روکا جائے۔بعد ازاں عدالت نے 50 ہزار روپے کے مچلکوں کے عوض عارف علوی کی 20 روزہ حفاظتی ضمانت منظورکرتے ہوئے کہا کہ کیس کی مزید سماعت کیلئے معاملہ آئینی بنچ کو بھیجا جا رہا ہے، مقدمات کی تفصیلات سمیت دیگر معاملات آئینی بنچ دیکھے گا۔
