ورلڈ بینک نے پاکستان کو سموگ پر قابو پانے،پائیدار ترقی کے اہداف کے حصول میں تعاون کی یقین دہانی کراتے ہوئے کہا کہ سی ڈی اے کیساتھ مشاورت سے انسداد سموگ حکمت عملی وضع کرنے کیلئے تیار ہیں جبکہ وفاقی وزیر داخلہ محسن نقوی نے کہا ہے کہ اسلام آباد کی ایئر کوالٹی بہتر کرنے کیلئے ورلڈ بینک کے تعاون کا خیر مقدم کریں گے،کوشش ہے سموگ مسئلہ کا ابھی سے تدارک کیا جائے،
اسلام آباد میں اینٹی سموگ مشینوں کی تنصیب کا جائزہ لیا جا رہا ہے، مقصد شہریوں اور مہمانوں کو صاف اور صحت مند ماحول کی فراہمی ہے۔ جمعرات کو وفاقی وزیر داخلہ محسن نقوی سے کنٹری ڈائریکٹر ورلڈ بینک ناجے بن حسین نے ملاقات کی جس میں سموگ مسئلہ پر باہمی تعاون سے قابو پانے پر اتفاق کیا گیا۔
ملاقات میں پاکستان میں پائیدار ترقی کے اہداف،باہمی دلچسپی کے امور،الیکٹرک بسوں، صاف پانی، سینی ٹیشن اور کچی آبادیوں کی ترقی کیلئے معاونت پر تبادلہ خیال کیا گیا۔وزیر داخلہ محسن نقوی نے گفتگو کرتے ہوئے کہا کہ رواں سال ایئر کوالٹی انڈیکس 271تک پہنچا ہے، اس سے قبل یہ صورتحال خطرناک سطح پر پہنچے ہمیں فوری طور پر جامع انسداد سموگ پلان وضع کرنا ہوگا۔
انہوں نے کہا کہ اسلام آباد کی ایئر کوالٹی کو بہتر کرنے اور محفوظ شہر بنانے میں ورلڈ بینک کے تعاون کا خیر مقدم کریں گے۔انہوں نے کہا کہ اسلام آباد دنیا کے خوبصورت ترین دارالحکومتوں میں سے ایک ہے، اس کے پرفضاء ماحول کو برقرار رکھنا ہوگا، بین الاقوامی معیار کی جائزہ رپورٹ کے ذریعے سموگ کی اصل وجوہات کو سامنے لانا ضروری ہے۔انہوں نے کہا کہ پوری کوشش ہے سموگ کے مسئلہ کا ابھی سے تدارک کیا جائے،
اسلام آباد میں اینٹی سموگ مشینوں کی تنصیب کا جائزہ لیا جا رہا ہے، ہمارا مقصد شہریوں اور مہمانوں کو صاف اور صحت مند ماحول دینا ہے۔ انہوں نے کہا کہ ورلڈ بینک کے اشتراک سے اسلام آباد میں فضائی آلودگی کو کنٹرول کرنے کے خواہاں ہیں، شہر کے ماحول کو صاف رکھنے کیلئے الیکٹرک بس سروس کا آغاز کیا گیا ہے، اس میں مزید اضافے کی ضرورت ہے۔
انہوں نے کہا کہ کچی آبادیوں اور دیہی علاقوں کی بہتری بھی ہماری ترجیحات میں شامل ہے، شہریوں کو صاف پانی اور سینی ٹیشن کی فراہمی بھی ہمارے اہداف میں کا حصہ ہے، اسلام آباد میں واسا کے ادارے کو اسلام آباد واٹر کے نام سے متعارف کرا رہے ہیں۔اس موقع پر کنٹری ڈائریکٹر ورلڈ بینک نے وزیر داخلہ کو سموگ پر قابو پانے اور پائیدار ترقی کے اہداف کے حصول میں تعاون کی یقین دہانی کراتے ہوئے کہا کہ سی ڈی اے کے ساتھ مشاورت سے انسداد سموگ حکمت عملی وضع کرنے کیلئے تیار ہیں، رپورٹ سے مسئلے کی جڑ تک پہنچنے میں مدد ملے گی۔
