وزیراعلی خیبرپختونخوا علی امین گنڈا پور نے مشترکہ مفادات کونسل کا اجلاس بلانے کیلئے وزیراعظم شہباز شریف کو خط تحریر کردیا۔ ذرائع کے مطابق خط میں کہا گیا ہے کہ آئین کے آرٹیکل 154کے تحت ہر 90دن میں اجلاس منعقد کرنا لازمی ہے لیکن جنوری 2024ء کے بعد سے یہ آئینی تقاضا پورا نہیں کیا جا رہا۔
خط میں کہا گیا کہ اجلاس وفاقی اکائیوں کے درمیان تعاون بڑھانے، اہم مسائل کے حل، ملک میں امن، ہم آہنگی اور سماجی و اقتصادی ترقی کیلئے ضروری ہے تاہم مشترکہ مفادات کونسل کی اجلاسوں کی تاخیر سے ان مسائل پر منفی اثرات مرتب ہو رہے ہیں۔خط میں درخواست کی گئی کہ ذاتی دلچسپی لے کر ان اجلاسوں کے باقاعدہ انعقاد کو یقینی بنایا جائے تاکہ ملک کو درپیش سیاسی و معاشی چیلنجز کا موثر حل نکالا جا سکے۔
