قائم مقام صدر سید یوسف رضا گیلانی نے صحافیوں،میڈیا ورکرز کے تحفظ کیلئے مزید مضبوط حکمت عملی،جامع نظام اپنانے کی ضرورت پرزور دیتے ہوئے کہا کہ پاکستان میں جمہوریت کے استحکام،شفافیت کے فروغ کیلئے آزادی صحافت ناگزیر ہے۔
قائم مقام صدر یوسف رضا گیلانی نے صحافیوں کیخلاف جرائم پر استثنیٰ کے خاتمے کے عالمی دن پر جار ی بیان میں کہا ہے کہ صحافی مشکل حالات بالخصوص تنازعات اور جنگوں کے دوران رپورٹنگ کرتے ہیں، پرخطر حالات اور دوران جنگ صحافیوں کو مختلف خطرات کا سامنا کرنا پڑتا ہے۔انہوں نے کہا ہے کہ صحافیوں کو سنسرشپ، تشدد، دھمکیوں، اغوا اور قتل جیسے خطرے درپیش ہیں، جنگ زدہ علاقوں بالخصوص غزہ میں اسرائیلی بمباری کے نتیجے میں بڑی تعداد میں صحافی قتل ہوئے،
اقوام متحدہ کے مطابق غزہ میں اب تک 130سے زائد صحافی مارے جا چکے ہیں جبکہ اسرائیل نے میڈیا کے اداروں اور صحافیوں کو بڑے پیمانے پر نشانہ بنایا۔ انہوں نے مطالبہ کیا کہ عالمی برادری اسرائیل کو صحافیوں کے خلاف جرائم پر جوابدہ ٹھہرائے۔انہوں نے کہا کہ پاکستان میں صحافیوں اور میڈیا ورکرز کے تحفظ کیلئے اقدامات کئے گئے ہیں، آئین پاکستان آزادی اظہار رائے، آزادی صحافت اور معلومات تک رسائی کا حق دیتا ہے۔
انہوں نے کہا کہ پاکستان میں جمہوریت کے استحکام، شفافیت کے فروغ کیلئے آزادی صحافت ناگزیر ہے۔انہوں نے کہا کہ صحافیوں کیخلاف تشدد کے واقعات سے جمہوریت کمزور ہوتی ہے، پاکستان نے صحافیوں کے تحفظ کیلئے صحافیوں اور میڈیا ورکرز کے تحفظ کا ایکٹ 2021ء پاس کیا، ہیلتھ انشورنس متعارف کرائی ہے۔
انہوں نے کہا کہ صحافیوں اور میڈیا ورکرز کے تحفظ کیلئے ابھی مزید اقدامات کرنا ہوں گے جس کیلئے مربوط حکمت عملی،جامع نظام اپنانے کی ضرورت ہے۔
