لاہور کے نواحی قصبے رائے ونڈ میں عالمی تبلیغی اجتماع کا پہلا مرحلہ شروع ہوگیا ہے، منتظمین کے مطابق پہلے مرحلے میں لاہور، پشاور، ملتان اور کوئٹہ کے علاوہ بیرون ملک سے لاکھوں مندوبین شرکت کریں گے۔
اجتماع کیلئے سیکیورٹی کے سخت انتظامات کئے گئے ہیں، پولیس سمیت دیگر سکیورٹی اداروں کے جوانوں کے علاوہ تبلیغی جماعت کے رضا کار بھی سیکیورٹی فرائض سرانجام دے رہے ہیں۔دوسری جانب سٹی ٹریفک پولیس لاہور نے اجتماع کے پہلے مرحلے کیلئے ٹریفک انتظامات کو حتمی شکل دے دی ہے۔
سی ٹی او لاہور عمارہ اطہر کے مطابق ایس پی صدر شہزاد خان کی نگرانی میں 13ڈی ایس پیز، 203ٹریفک انسپکٹرز،110پٹرولنگ افسران اور 999ٹریفک وارڈنز تعینات کئے گئے ہیں جبکہ گاڑیوں کی پارکنگ کیلئے 7سٹینڈز مختص کئے گئے ہیں۔ٹریفک پولیس کے مطابق دوسرے شہروں سے آنے والے شرکاء موٹروے اور لاہور رنگ روڈ استعمال کریں گے،
جی ٹی روڈ اور راولپنڈی، اسلام آباد کی طرف سے آنیوالے شرکاء کو براستہ کالا شاہ کاکو انٹرچینج موٹروے کے ذریعے ٹھوکر نیاز بیگ بھجوایا جا رہا ہے جبکہ اوکاڑہ سے آنیوالے شرکاء براستہ مانگا بائی پاس رائیونڈ اجتماع میں شرکت کریں گے۔ واضح رہے کہ اجتماع کا پہلا مرحلہ3نومبر کی صبح 8بجے اجتماعی دعاء کیساتھ اختتام پذیر ہو گا۔
