اسلامک ٹریڈ فنانسنگ کارپوریشن نے پاکستان کو 3 ارب ڈالر کا قرض فراہم کر نے کا اعلان کر دیا ،پہلے مرحلے میں 27 کروڑ ڈالر فراہم کئے جائیں گے۔ واشنگٹن میں وزیر خزانہ محمد اورنگزیب نے اسلامک ٹریڈ فنانسنگ کارپوریشن (آئی ٹی ایف سی)کے وفد سے ملاقات کی جس میں اسلامک ٹریڈ کے سی ای او انجینئر ہانی سالم سنبول بھی ملاقات میں موجود تھے۔
انٹر نیشنل اسلامک ٹریڈ فنانس کارپوریشن نے پاکستان میں اپنے پورٹ فولیو کو متنوع بنانے کے عزم کا اظہار کیا اور پاکستان کوتین سال میں 3 ارب ڈالر قرض فراہم کرنے کا اعلان کیا جس میں سے 27 کروڑ ڈالر فوری فراہم کیے جائیں گے۔
وزیر خزانہ نے معاہدے کے تحت 3 ارب ڈالر کی کموڈٹی فنانسنگ کو سراہا۔ محمد اورنگزیب نے اس سلسلے میں حکومت کی مکمل حمایت کا یقین دلایا۔ قبل ازیں وزیر خزانہ نے امریکی محکمہ خارجہ کی اسسٹنٹ سیکرٹری برائے اقتصادی اور کاروباری امور ایمی ہولمین سے بھی ملاقات کی۔ جس میں انہوں نے پاکستان کی سماجی و اقتصادی ترقی میں پاک،امریکا اقتصادی شراکت داری کی اہمیت کو تسلیم کیا اور امریکی حمایت کا شکریہ ادا کیا۔ ملاقات میں وزیر خزانہ نے امریکی کمپنیوں کو زراعت، آئی ٹی، توانائی، اور کان کنی کے شعبوں میں سرمایہ کاری کی دعوت دی۔
