آئی سی سی نے 25اوورز میں 2بال استعمال کرنے کی تجویز دے دی۔ میڈیا رپورٹ کے مطابق آئی سی سی نے نے ٹیسٹ اور ون ڈے کرکٹ کے فروغ کیلئے تجاویز پیش کرتے ہوئے کہا ہے کہ ڈبلیو ٹی سی کے اگلے سائیکل میں ٹیسٹ سیریز 2کی بجائے 3میچز پر مشتمل ہونی چاہئے۔
آئی سی سی کے مطابق جنوبی افریقہ اورنیوزی لینڈ سمیت کچھ ممالک صرف 2میچز پر مشتمل ٹیسٹ سیریز کھیلتے ہیں، آسٹریلیا، انگلینڈ اور بھارت زیادہ میچز کی سیریز کھیلتے ہیں، اس طرح ٹیسٹ کرکٹ کے فروغ میں مدد نہیں ملتی جبکہ پوائنٹس کی تقسیم بھی غیرمنصفانہ ہوجاتی ہے۔کمیٹی نے مو قف اپنایا ہے کہ اگلے سائیکل میں میزبان ممالک کو شیڈول بناتے وقت زیادہ ڈے نائٹ ٹیسٹ میچز رکھنے چاہئیں۔
آئی سی سی کرکٹ کمیٹی نے ون ڈے کرکٹ میچز میں بیٹرز اور باؤلرزمیں توازن برقراررکھنے کیلئے میچ کے پہلے 25اوورز میں 2گیندیں استعمال کرنے کی سفارش کرتے ہوئے کہاہے کہ 25اوور ز کے بعد ایک ہی گیند استعمال کی جائے۔ذرائع کے مطابق آئی سی سی کرکٹ کمیٹی کی سفارشات کپتانوں کو بھیجی جائیں گی۔
