پاکستان تحریک انصاف(پی ٹی آئی)کے رکن قومی اسمبلی زین قریشی نے کہا ہے کہ کہ اپنے والد شاہ محمود قریشی کے کہنے پر روپوشی اختیار کی، والد نے لاہور بلایا اور کہا کسی صورت آئینی ترمیم منظور نہیں ہونی چاہیے، آئینی ترمیم کی حمایت سے متعلق میرے خلاف گمراہ کن پروپیگنڈا کیا جا رہا ہے۔ اپنے ویڈیو بیان میں زین قریشی نے کہا میری کسی حکومتی اہلکارسے ملاقات ثابت ہوجائے تو سیاست چھوڑ دوں گا، اسمبلی میں موجودگی کی غلط خبر کی تردید کرتا ہوں، میرا قومی اسمبلی جانا تو دور کی بات میں قریب سے بھی نہیں گزرا۔ ان کا کہنا تھا کہ پی ٹی آئی فیملی کو یقین دلانا چاہتا ہوں میں اس ترمیم کا حصہ نہیں بنا مجھ پر تنقید کرنے والے اپنے گریبان میں جھانکیں، مجھے زدوکوب کیا گیا میری بیوی کو بھی اغوا کیا گیا لیکن میں پارٹی پالیسی اور پی ٹی آئی کے ساتھ کھڑا ہوں۔
