قومی اسمبلی اجلاس کے لیے سیکیورٹی کے سخت انتظامات، مہمانوں کے داخلے پر پابندی عائد کی گئی۔ ترجمان قومی اسمبلی کے مطابق ون ڈے پریس گیلری کارڈ جاری کرنے پر سختی کی گئی ہے، قومی اسمبلی کے اجلاس کے لیے ون ڈے پریس گیلری کارڈ جاری نہیں کیے جائیں گے۔ صرف میڈیا کے ان نمائندوں کو پارلیمنٹ ہاوس میں داخلے کی اجازت ہوگی جن کو ڈائریکٹوریٹ جنرل آف میڈیا قومی اسمبلی سیکریٹریٹ کی جانب سے فل سیشن پریس گیلری کارڈ جاری کیے گئے ہیں۔ سیکیورٹی وجوہات کو ملحوظِ خاطر رکھتے ہوئے تمام صحافی حضرات سے گزارش ہے کہ اپنا پریس گیلری کارڈ ہمراہ رکھیں۔ پارلیمنٹ کے گیٹ نمبر 1 پر کوریج کرنے والے کیمرہ مینوں کی انٹری مرتب کردہ لسٹ کے ذریعے ہوگی۔
