رہنماء پی ٹی آئی فواد چودھری نے ٹی ایل پی پر پابندی کی حمایت کرتے ہوئے کہا ہے کہ قومی معاملات میں سنجیدگی ضروری ہے، آرمی چیف کسی ملک سے مذاکرات یا معیشت پر بات کررہے ہیں تو وزیراعظم کا کیا کام ہے؟، پی ٹی آئی لیڈر شپ نابالغ ہے، سہیل آفریدی بانی کی رہائی میں کردار ادا کر سکتے ہیں، عمران خان سے ملنے نہ دینا ان کی تضحیک ہے۔
انسداد دہشت گردی لاہور کے باہر میڈیا سے گفتگو کرتے ہوئے فواد چودھری نے کہا کہ گزشتہ روز پھر وزیر اعلی خیبرپختونخوا کو بانی پی ٹی آئی سے ملاقات نہیں کرنے دی گئی یہ سہیل آفریدی کی تضحیک ہے، وہ بانی پی ٹی آئی کی رہائی میں کرادر ادا کرسکتے ہیں، عدالتیں اپنے فیصلوں پر عملدرآمد نہیں کروا رہیں۔
انہوں نے کہا کہ پی ٹی آئی کی لیڈر شپ نا بالغ ہے، پارٹی چند ایسے لوگوں کے ہاتھ میں ہے جیسے بندر کے ہاتھ ماچس آئی ہو۔
انہوں نے کہا کہ سہیل آفریدی کوٹ لکھپت جیل میں شاہ محمود قریشی سمیت دیگر قید رہنمائوں سے ملاقات کریں، شاہ محمود انہیں مثبت مشورہ دیں گے، ایسے لوگوں سے بات کرنے سے ٹمپریچر کم ہوگا۔
انہوں نے کہا کہ شہباز شریف کو وزیراعظم بنے ہوئے ساڑھے 3سال ہوچکے ہیں، اب انہوں نے کمیٹیاں بنا دی ہیں، یعنی انہوں نے ہار مان لی ہے، ملکی معیشت کا برا حال ہے، پاک فوج کے جوان جانیں دے رہے ہیں، آرمی چیف کسی ملک سے مذاکرات یا معیشت پر بات کررہے ہیں تو وزیراعظم کا کیا کام ہے؟۔
انہوں نے کہا کہ اسد عمر نے خواجہ آصف کو پنجابی فلموں میں کام کرنے کا مشورہ دیا ہے، خواجہ آصف کو پنجاب کی فلموں میں کوئی رول دے دیں تاکہ اس میں بڑھکیں مار لیں، قومی معاملات میں سنجیدگی ضروری ہے، ترکی کا بیان آچکا ہے کہ افغانستان اور پاکستان کے درمیان سیز فائر 6نومبر تک رہے گا، دونوں ممالک کے درمیان امن بہت ضروری ہے۔
انہوں نے کہا کہ ہماری سرحدوں پر زخمی دشمن بیٹھا ہے، ٹرمپ ہر ساتویں دن طیارے گرانے کی چابی دے دیتا ہے ،افغان طالبان کا بھارت کے کہنے پر چلنا وہاں کے عوام سے زیادتی ہوگی، انہیں سوچنا چاہئے۔
انہوں نے کہا کہ ٹی ایل پی پر پابندی لگنا اچھی بات ہے ،یہ پرتشدد گروہ ہے، ان پر پابندی لگانا اچھی بات ہے، افسوس ہے ٹی ایل پی کے خلاف سپریم کورٹ کے خلاف ریفرنس کیوں فائل نہیں کیا گیا۔
