لاہور: سینئر وزیر پنجاب حکومت مریم اورنگزیب نے پنجاب حکومت کی جانب سے بجلی بلوں میں ریلیف کی تفصیلات جاری کرتے ہوئے کہا ہے کہ وزیر اعلیٰ مریم نواز نے مشکل معاشی حالات میں بھی ناممکن کام ممکن کر دکھایا،عوام کو مزیدریلیف دیں گے۔
تفصیلات کے مطابق سینئر صوبائی وزیر مریم اورنگزیب نے جاری بیان میں بجلی بلوں میں ریلیف کی تفصیلات جاری کرتے ہوئے بتایا کہ 201 سے500 یونٹ تک بجلی صارفین کوبلوں میں 14 روپے فی یونٹ کمی کا ریلیف پہنچنا شروع ہوگیاہے، لاہور، ملتان، فیصل آباد، گوجرانوالہ اور اسلام آباد کی 5 بجلی کمپنیوں کے 35 لاکھ 16ہزار877 صارفین کو ریلیف دیاگیاہے۔
انہوں نے بتایا کہ لاہور الیکٹرک سپلائی کارپوریشن کے 8 لاکھ 40 ہزار صارفین،ملتان الیکٹرک سپلائی کارپوریشن کے 6 لاکھ 53 ہزار 883، فیصل آباد کے 5 لاکھ 6 ہزار 139، گوجرانوالہ کے 7 لاکھ 31 ہزار 305 اور اسلام آباد کے 7 لاکھ 85 ہزار 550 صارفین کو ریلیف ملا ہے۔
انہوں نے کہا کہوزیر اعظم شہباز شریف نے بھی ایک سے 200 یونٹ والے بجلی صارفین کو 50 ارب روپے کا ریلیف دیا ہے۔انہوں نے کہا کہ وزیر اعلیٰ مریم نواز نے مشکل معاشی حالات میں بھی ناممکن کام ممکن کر دکھایا اور عوام کو مزیدریلیف دیں گے۔
