خیبرپختونخوا حکومت نے سکولوں میں چھٹی جماعت سے 12 ویں جماعت تک اے آئی کو نصاب میں شامل کرنے کا فیصلہ کرلیا۔
جاری دستاویزات کے مطابق اے آئی مضمون کی تدریس کیلئے محکمہ تعلیم نے 7ہزار 555آئی ٹی اساتذہ کی بھرتی کا بھی فیصلہ کیا ہے تاکہ نئی ٹیکنالوجی کو موثر انداز میں طلبہ تک منتقل کیا جا سکے۔
محکمہ تعلیم خیبرپختونخوا کے مطابق اے آئی کو باضابطہ طور پر مارچ 2026سے نصاب کا حصہ بنا یا جائے گا۔
ذرائع کے مطابق اس وقت اے آئی پڑھانے کیلئے صوبے بھر میں 5ہزار 525آئی ٹی لیب کی کمی ہے، ہائیر سیکنڈری سکولوں میں 225جبکہ مڈل سکولوں میں 3ہزار 515آئی ٹی لیب درکار ہیں جو تاحال دستیاب نہیں ہیں۔
محکمہ ابتدائی و ثانوی تعلیم کے مطابق سکولوں میں پڑھائے جانیوالے کمپیوٹر سائنس کے موجودہ نصاب میں اے آئی سے متعلق مواد شامل ہی نہیں جس کے باعث نصاب میں بڑی تبدیلیاں ناگزیر قرار دی جا رہی ہیں جبکہ مختلف جماعتوں میں 35سے 50فیصد تک اے آئی کا مواد شامل کیا جائے گا۔
