وزیراعلی خیبرپختونخوا سہیل آفریدی نے کہا ہے کہ صوبے کا حق ڈنکے کی چوٹ پر لوں گا، کسی کی بھیک نہیں چاہئے، افغانستان سے مسلسل دہشت گردی کے باعث شہادتیں ہورہی ہیں، میری ہمدردیاں صرف پاکستان کے ساتھ ہیں، فیصلہ ساز پالیسی بناتے وقت سٹیک ہولڈرز کو اعتماد میں لیں۔
داہگل ناکے پر میڈیا سے گفتگو کرتے ہوئے سہیل آفریدی نے کہا کہ بانی میرے لیڈر ہیں ملاقات میرا حق ہے، عمران خان کے احکامات پر کابینہ کی تشکیل کرلی ہے جلد اعلان ہوگا، پہلے مرحلے میں کابینہ 10سے زائد ممبران پر مشتمل ہوگی۔
انہوں نے کہا مجھے بانی سے ملاقات سے روکنے والوں کو پتا ہوگا کہ ان کو مجھ سے کیا خوف ہے، ہائیکورٹ کے تحریری آرڈر ملنے پر توہین عدالت کی کارروائی میں جائیں گے، میں اپنے قائد سے دو سال سے نہیں ملا۔
انہوں نے کہا کہ مقدمات کا سامنا کرنے والے کارکنوں کو شکایات تھیں، ان کارکنوں سے ملاقات ہوگئی ہے، ان کو کل بلایا تھا، مکمل تعاون کریں گے۔
انہوں نے کہا کہ مارٹر گولے اور ڈرون گرنے سے 21،21لوگ شہید ہورہے ہیں، جن کے گھروں میں شہادتیں ہورہی ہیں وہی درد سمجھتے ہیں، فوج میری ہے ، ایک روز قبل شہید ہونیوالے 6 اہلکاروں کے جنازوں پر گیا ہوں، انہیں کندھا دیا، خیبرپختونخوا نے دہشت گردی کے خلاف 80 ہزار جانوں کا نذرانہ دیا، کل میرے کندھے پر 80 ہزار شہدا کا بوجھ تھا۔
انہوں نے کہا کہ افغانستان سے مسلسل دہشت گردی کے باعث شہادتیں ہورہی ہیں ،میری ہمدردی صرف اور صرف پاکستان کے ساتھ ہیں، اگر ایک پالیسی پاکستان میں بنتی ہے تو فیصلہ سازوں کو چاہیے کہ تمام اسٹیک ہولڈرز کو اعتماد میں لیں،جو غلط پالیسی ہوگی اس کے خلاف ہوں۔
انہوں نے کہا کہ نومبر میں اگر این ایف سی کے حوالے سے میٹنگ ہوئی تو ضرور جائوں گا اور اپنے صوبے کا حق مانگوں گا۔
انہوں نے کہا کہ پرانی اور کباڑ کی گاڑیاں نہیں چاہئیں صوبے کا حق ڈنکے کی چوٹ پر لوں گا، کسی کی بھیک نہیں چاہئے۔
انہوں نے کہا کہ میں عوامی مینڈیٹ سے آیا ہوں اور عوامی مینڈیٹ سے ہی رہوں گا۔
