لاہور ہائیکورٹ نے شہری کی عدم بازیابی رپورٹ پر عدم اطمینان کا اظہارکرتے ہوئے ڈائریکٹر ایف آئی اے لاہور اور ڈی آئی جی انویسٹی گیشن کو طلب کرلیا۔منگل کو لاہور ہائیکورٹ میں جسٹس چودھری سلطان محمود نے شہری کی عدم بازیابی کے خلاف کیس پر سماعت ہوئی، وفاقی حکومت کی جانب سے خالد نواز گھمن اور پنجاب حکومت کے وکلا پیش ہوئے، ڈی آئی جی نے مغوی کی بازیابی کیلئے کیے گئے اقدامات پررپورٹ پیش کی۔
جسٹس چودھری سلطان محمود نے ڈی آئی جی سے استفسار کیا کہ کیوں شہری بازیاب نہیں ہو رہا؟ ڈی آئی جی انوسٹی گیشن نے بتایا کہ سپیشل ٹیم تشکیل دی ہے، مغوی کی باز یابی کیلئے کوشش کر رہے ہیں۔
عدالت نے پوچھا کہ شہری کی بازیابی کیلئے کتنا وقت چاہئے؟ ڈی ائی جی انوسٹی گیشن نے 15روز کی مہلت مانگی ، اس پر جسٹس چودھری سلطان محمود نے کہا کہ ماشااللہ ریمانڈ کا وقت بھی 14دن کا ہی ہوتا ہے، بازیابی کیس میں اتنا وقت کیسے دے سکتے ہیں؟۔
وفاقی حکومت کے وکیل نے آگاہ کیا کہ مغوی شہری نیشنل سائبر کرائم انوسٹی گیشن ایجنسی کے پاس نہیں۔بعدازاں عدالت نے ڈائریکٹر ایف آئی اے لاہور اور ڈی آئی جی انوسٹی گیشن کو 2اکتوبر کو طلب کرتے ہوئے سماعت ملتوی کردی۔
