راولپنڈی میں ڈینگی کے وار نہ رک سکے، گزشتہ 24 گھنٹوں میں مزید 17 افراد وائرس کا شکار ہوگئے۔ محکمہ صحت حکام کے مطابق راولپنڈی میں ڈینگی کے 10816مریضوں کی سکریننگ کی گئی جس میں 656 مریضوں میں وائرس رپورٹ ہوا، اس وقت ڈینگی کے 61 کنفرم مریض ہسپتالوں میں زیر علاج ہیں۔
حکام کے مطابق رواں سال اب تک ڈینگی سے کوئی ہلاکت رپورٹ نہیں ہوئی ۔حکام کے مطابق ڈینگی کے مریض ڈھوک منگٹال، ڈھوک بابو عرفان، کونتریلا، پنڈوڑہ، دھمیال ،کوٹھہ کلاں، ہزارہ کالونی، چک جلال دین اور وارڈ 2واہ کینٹ سے رپورٹ ہوئے ہیں۔
حکام نے بتایا کہ 1499ڈینگی سرویلنس ٹیموں نے اب تک 53 لاکھ 16ہزار 568گھروں کی چیکنگ جس میں 1لاکھ 57ہزار 73 گھروں سے لاروا برآمد ہوا جبکہ 14لاکھ 26ہزار، 111سپاٹ چیک کے دوران 21ہزار 21سپاٹ پازٹیو رہے۔محکمہ صحت کے مطابق اب تک 1لاکھ 78ہزار 094مقامات پر لاروا تلف کیا گیا ہے جبکہ ڈینگی ایس او پیز کی خلاف ورزی پر 4265ایف آئی آرز درج، 1813بلڈنگ سربمہر اور 3415چالان درج کیے گئے جبکہ ڈینگی لاروا کی موجودگی پر 1کروڑ 5لاکھ 56ہزار روپے جرمانہ کیا گیا۔
