پشاور: خیبرپختونخوا کے مختلف علاقوں میں پھرشدید بارشوں سے پانی گھروں اور دکانوں میں داخل ہوگیا جبکہ چھتیں گرنے کے 2واقعات میں بچی جاں بحق، ایک شخص زخمی ہوگیا۔
ذرائع کے مطابق خیبر میں طوفانی بارش کے باعث باڑہ، جمرود اور گردونواح میں گھروں اور دکانوں میں پانی داخل ہوگیا، ریسکیو 1122 خیبر کی ٹیموں نے ہیوی مشینری اور ڈی واٹرنگ پمپ کے ذریعے مختلف مقامات پر نکاسی آب کا عمل شروع کر دیا۔
دیر لوئر کے مختلف علاقوں میں بھی گرج چمک کیساتھ بارش ہوئی جبکہ ٹانک شہر ومضافاتی علاقوں میں بھی شدید ہوائوں کے ساتھ موسلا دھار بارش جاری ہے جس سے نقصان کا اندیشہ ہے۔
ملاکنڈ میں سوات ایکسپریس وے پر لینڈ سلائیڈنگ کے باعث ٹریفک دوسرے روز بھی معطل رہی، جس سے گاڑیوں کی لمبی قطاریں لگ گئیں، حکام نے شہریوں کو جی ٹی روڈ استعمال کرنے کی ہدایت کی ہے۔
پشاور میں نحقی چارسدہ روڈ پر گھر کی چھت گرنے سے کمسن بچی ملبے تلے دب کر جاں بحق ہوگئی، ریسکیو حکام اطلاع ملتے ہی موقع پر پہنچے اور بچی کو ملبے سے نکال کر ہسپتال منتقل کیا، فقیر کلے ورسک روڈ پر کمرے کی دیوار گرنے سے 30سالہ محمد طفیل زخمی ہوگیا جسے لیڈی ریڈنگ ہسپتال پشاور منتقل کردیاگیا۔
