اسلام آباد: پاور ڈویژن نے سیلاب متاثرہ علاقوں میں بجلی جلد مکمل بحال کرانے کی یقین دہانی کراتے ہوئے بتایا ہے کہ 356 متاثرہ فیڈرز میں سے 152 کو مکمل، 202 کو عارضی طور پر بحال کر دیا گیا ہے۔
پاور ڈویژن سے جاری بیان کے مطابق بارشوں، سیلاب سے پیسکو کے علاقے سوات، بنر، شانگلہ، صوابی اور ڈی آئی خان کے 12گرڈز اور 91فیڈرز متاثر ہوئے، صوابی اور ڈی آئی خان میں بجلی کی بحالی کا کام مکمل کر لیا گیا، پیسکو کے 84 فیڈرز مکمل اور 7جزوی طور پر بحال ہو چکے ہیں۔
بیان کے مطابق گیپکو کے زیر انتظام علاقوں سیالکوٹ، نارووال، وزیرآباد اور حافظ آباد کے 10گرڈز اور 87فیڈرز متاثر ہوئے، گیپکو کے 68فیڈرز مکمل اور 17 جزوی طور پر بحال کر دیے گئے۔
لیسکو میں لاہور، اوکاڑہ، شیخوپورہ، قصور اور ننکانہ کے 56متاثرہ فیڈرز جزوی طور پر بحال ہو چکے ہیں جبکہ مکمل بحالی 31اگست سے 5ستمبر تک متوقع ہے۔بیان میں بتایا گیا ہے کہ فیسکو کے زیر انتظام علاقوں فیصل آباد، چنیوٹ، جھنگ، سرگودھا، میانوالی اور ڈی آئی خان کے 17گرڈ اور 53متاثرہ فیڈرز عارضی طور پر بحال کر دیئے گئے۔
میپکو کے زیر انتظام علاقوں میں 67فیڈرز متاثر ہوئے، پانی اترتے ہی متاثرہ فیڈرز کی بحالی کا عمل فوری شروع ہو جائے گا۔ٹیسکو کے علاقے شمالی وزیرستان کے متاثرہ فیڈرز عارضی طور پر بحال کر دیئے گئے ہیں، مکمل بحالی 5 ستمبر تک متوقع ہے۔
پاور ڈویژن کے مطابق مجموعی طور پر 39گرڈ اور 356 متاثرہ فیڈرز میں سے 152کو مکمل اور 202کو عارضی طور پر بحال کر دیا گیا ہے، ڈسکوز کی فیلڈ ٹیمیں دن رات بحالی کے کام میں مصروف ہیں۔
