کوئٹہ: وفاقی وزیرداخلہ محسن نقوی نے کہا ہے کہ ریاستی رٹ کسی کو چیلنج نہیں کرنے دیں گے، فتنے کا سر سختی سے کچلا جائے گا، ہمارے لوگوں کو شہید کرنیوالوں کو بھاگنے یا چھپنے نہیں دیں گے، اینٹ کا جواب پتھر سے دیا جائے گا۔
تفصیلات کے مطابق وفاقی وزیر داخلہ محسن نقوی نے کوئٹہ میں گورنر بلوچستان جعفر مندوخیل سے ملاقات کی جس میں بلوچستان میں امن و امان کی صورتحال پر غور کیا گیا۔دونوں رہنماؤں نے بلوچستان میں دہشتگردی کے حالیہ واقعات کی مذمت اور شہداء کے لواحقین سے اظہار یکجہتی کیا۔
اس موقع پر گفتگو کرتے ہوئے وزیر داخلہ محسن نقوی نے کہا کہ بلوچستان میں قیام امن کیلئے ہر سطح پر فوری اقدامات کئے جائیں گے،صوبے سے دہشت گردوں کا مکمل صفایا کرنے کا وقت آگیا ہے،ہمارے لوگوں کو شہید کرنے والوں کوبھاگنے یا چھپنے نہیں دیں گے۔
انہوں نے کہا کہ ریاست کی رٹ کسی کو چیلنج نہیں کرنے دیں گے،دہشت گرد گروہوں سے کوئی مذاکرات نہیں ہوں گے اور فتنے کا سر سختی سے کچلا جائے گا۔ انہوں نے کہا کہ ایپکس کمیٹی میں ریاست کو نہ ماننے والوں سے آہنی ہاتھوں سے نمٹنے اورریاست کے سامنے ہتھیار ڈالنے اور آئین پاکستان کو ماننے والوں سے بات چیت کا فیصلہ کیا گیا ہے۔
انہوں نے کہا کہ دہشت گردی کے واقعات میں ملوث کسی گروہ سے کوئی رعایت نہیں ہوگی،دہشتگردوں اور سہولت کاروں کو اینٹ کا جواب پتھر سے دیں گے۔
انہوں نے کہا کہ بلوچستان کی سیکیورٹی فورسز، فرنٹیئر کور، پولیس اور لیویز کی ضروریات کو پورا کیا جائے گا۔اس موقع پر گفتگو کرتے ہوئے گورنربلوچستان نے ایپکس کمیٹی اجلاس کے فیصلوں کو بروقت اور قیام امن کے لئے ناگزیر قرار دیتے ہوئے کہا کہ سیکیورٹی فورسز اور عوام ایک ہیں، چند عناصر امن کو سبوتاژ کرنے کے درپے ہیں۔
