اسلام آباد: وزیر دفاع خواجہ آصف نے کہا ہے کہ عمران خان کے بیٹے پاکستان آنا چاہتے ہیں تو آئیں، حکومت کیوں روکے گی؟، احتجاج ہرسیاسی جماعت کا حق ،پی ٹی آئی تشدد کی طرف رجوع نہ کرے، 9مئی یا 26نومبر برپا کرنے کی اجازت نہیں دی جائے گی، مودی دنیا میں مذاق بن چکا، باتیں سنجیدہ نہیں لینی چاہئیں، غزہ میں بچوں کو بھوکا مارا جانا انسانیت کیلئے باعث شرم ہے، اسرائیل کے قیام کاذمہ دار برطانیہ، فلسطینیوں کیساتھ کھڑا ہو کر مظالم کا ازالہ کرے۔
نجی ٹی وی سے گفتگو کرتے ہوئے خواجہ آصف نے کہا کہ عبرتناک شکست کے بعد نریندر مودی کی ناؤ اب ڈوب چکی ہے، بیانات دے کر مودی اپنی ساکھ دوبارہ بحال کرنا چاہتا ہے۔ انہوںنے کہا کہ مودی کی باتیں سنجیدہ نہیں لینی چاہئیں، بھارتی پارلیمنٹ میں مودی کو شرمندگی کا سامنا کرنا پڑا، بھارتی میڈیا اور فوج خود کہہ رہی ہے کہ جہاز گرے، اب مودی کو بھی مان لینا چاہئے کہ اس کا سورج غروب ،سیاسی خاک ختم ہوچکی ہے۔
انہوں نے کہا کہ نریندر مودی بین الاقوامی مذاق بن چکا ہے وہ جس سے گلے ملتا ہے وہ گلے نہیں ملتے، کسی کو ہاتھ ملانا چاہتا ہے تو وہ ہاتھ نہیں ملاتا۔ انہوں نے کہا کہ بڑی طاقتوں کی جانب سے فلسطینیوں پر قحط نازل کیا گیا تاہم اب ان کی قربانیاں رنگ لارہی ہیں جس طرح غزہ کے بچوں کو بھوکامارا جارہا ہے یہ انسانیت کیلئے قابل شرم ہے، بھوک، قحط اور افلاس سے جو لوگ مارے جارہے ہیں ان کی تعداد اس سے زیادہ ہے۔
انہوں نے کہا کہ برطانیہ اور فرانس کا فلسطینی ریاست کو تسلیم کرنا بہت اہم نکتہ ہے، برطانیہ پر یہ قرض ہے کیونکہ اسرائیلی ریاست برطانیہ نے بنائی ، 1921ء میں جو ڈیکلریشن آیا تھا اس کی سازش برطانیہ نے خود کی تھی۔انہوں نے کہا کہ برطانیہ فلسطینی قوم کے اوپر اسے پنا قرض اتارے،فلسطینیوں کیساتھ کھڑا ہو کر کئے گئے مظالم کا ازالہ کرے۔
ایک سوال پر انہوں نے کہا کہ بانی پی ٹی آئی کے بیٹوں کو آنے سے حکومت کیوں روکے گی؟، پاکستان آنے کیلئے وزٹ، اجازت اور شرائط پوری کریں اور آ جائیں،میں نے تو میڈیا پر ہی پڑھا ہے کہ والد نے منع کیا وہ نہ آئیں۔ انہوں نے کہا کہ اگر بانی پی ٹی آئی کے بیٹے پاکستان آنے کا فیصلہ کررہے ہیں تو بالکل آئیں، ہماراموقف صرف یہ ہے کہ پی ٹی آئی تشدد کی طرف رجوع نہ کرے، احتجاج کرنا سیاسی جماعتوں کا حق ہوتا ہے، انہیں اس کی اجازت ہوگی۔انہوں نے کہا کہ اگر پی ٹی آئی چاہتی ہے کہ 9مئی یا 26نومبر پھر برپا کرے تو اجازت نہیں دی جائے گی۔
