اسلام آباد: وزیراعظم شہباز شریف نے انسانی سمگلنگ کو جڑ سے ختم کرنے کے حکومتی عزم کا اعادہ کرتے ہوئے کہا ہے کہ سنگین جرم میں ملوث عناصر کو کیفر کردار تک پہنچانے کیلئے بھرپور اقدامات جاری ہیں، محفوظ، باوقار ،استحصال سے پاک معاشرے کی تشکیل کیلئے سٹیک ہولڈرز انسانی سمگلنگ کیخلاف آگہی مہمات میں حکومت کا ساتھ دیں۔
انسانی سمگلنگ کیخلاف عالمی دن پر جاری بیان میں وزیراعظم نے کہا کہ یہ دن ہر سال انسانی سمگلنگ جیسے بھیانک اور منظم جرم کی روک تھام، اس کے محرکات اور مکروہ اثرات کو اجاگر کرنے کے ساتھ ساتھ عوامی شعور بیدار کرنے کیلئے منایا جاتا ہے۔
انہوں نے کہا کہ رواں سال یہ دن ”انسانی سمگلنگ ایک منظم گروہی جرم، استحصال کا خاتمہ”کے عنوان کے تحت منایا جا رہا ہے۔ وزیراعظم نے کہا ہے کہ جرائم پیشہ گروہ دنیا بھر میں فکر معاش میں مبتلا افراد کو جھوٹے خواب دکھا کر انسانی سمگلنگ کا نشانہ بناتے ہیں جس سے وہ بدترین استحصال سے دوچار ہوتے ہیں۔
انہوں نے کہا کہ پاکستان میں گزشتہ برسوں کے دوران تارکین وطن کی سمندر میں جانوں کے ضیاع جیسے افسوسناک واقعات نے انسانی سمگلنگ کی ہولناک حقیقت کو بے نقاب کیا، وفاقی حکومت نے اس سنگین مسئلے سے نمٹنے کیلئے ایک خصوصی ٹاسک فورس تشکیل دی ہے جو اس جرم میں ملوث عناصر کو کیفر کردار تک پہنچانے کیلئے موثر اور بھرپور اقدامات کر رہی ہے۔
وزیراعظم نے ایف آئی اے، انٹلیجنس بیورو اور دیگر قانون نافذ کرنے والے اداروں کی کاوشوں کو سراہتے ہوئے کہا کہ ان کی محنت سے انسانی سمگلنگ کی کارروائیوں میں نمایاں کمی آئی ہے اور کئی سرکاری اہلکاروں کو بھی قانون کے کٹہرے میں لایا گیا ہے۔ انہوں نے کہا ہے کہ حکومت عوام کو بیرون ملک قانونی روزگار کے مواقع اور ان کے محفوظ طریقہ کار سے آگاہ کرنے کے لیے مسلسل اقدامات کر رہی ہے، پاکستان کے شہریوں کی معاشی ترقی کے لیے اندرون و بیرون ملک روزگار کے بہتر مواقع پیدا کیے جا رہے ہیں۔
وزیراعظم نے خبردار کیا کہ بہتر مستقبل کی تلاش میں غیر قانونی یا گمراہ کن راستوں کا انتخاب نہ صرف جان کے ضیاع کا سبب بن سکتا ہے بلکہ ملکی اور بین الاقوامی قوانین کی بھی سنگین خلاف ورزی ہے۔ وزیراعظم نے کہا کہ محفوظ، باوقار اور استحصال سے پاک معاشرے کی تشکیل کیلئے عوام، میڈیا، سول سوسائٹی اور بین الاقوامی شراکت دارانسانی سمگلنگ کے خلاف آگہی مہمات میں حکومت کا ساتھ دیں ۔
