برطانوی وزیرِ اعظم کیئر سٹارمر نے کابینہ کے ہنگامی اجلاس کے بعد میڈیا سے گفتگو کرتے ہوئے کہا ہے کہ اگر اسرائیل نے غزہ میں جنگ بندی سمیت دیگر شرائط پر عمل نہ کیا تو برطانیہ ستمبر میں اقوامِ متحدہ کی جنرل اسمبلی کے اجلاس میں فلسطین کو بطور ریاست تسلیم کر لے گا۔
کابینہ اجلاس کے اعلامیے میں کہا گیاہے کہ برطانیہ فلسطین کو بطور ریاست اس صورت میں تسلیم کرے گا اگر ’اسرائیلی حکومت نے غزہ کی بدترین صورتحال کو بہتر بنانے کے لیے اہم اقدامات نہ کیے، غزہ میں جنگ بندی نہ کی، مقبوضہ غربِ اردن کو اپنے ساتھ غیرقانونی طور پر ضم کیا اور دو ریاستی حل کے لیے ایک طویل المدتی امن مرحلے پر بات نہ کی۔
انھوں نے اس بات پر بھی زور دیا کہ برطانیہ حماس سے مطالبہ کرتا ہے کہ وہ تمام یرغمالیوں کو رہا کرے، جنگ بندی معاہدے پر دستخط کرے، تسلیم کرے کہ وہ غزہ کی کسی بھی حکومت میں کوئی کردار ادا نہیں کریں گے اور اپنا اسلحہ پھینک دیں۔بیان میں کہا گیا ہے کہ سٹارمر اقوامِ متحدہ کے اجلاس سے قبل صورتحال کا جائزہ لیں گے اور دیکھیں گے کہ آیا سٹیک ہولڈرز اس حوالے سے مثبت قدم اٹھائے ہیں جس کے بعد حتمی فیصلہ کیا جائے گا۔
موجودہ صورتحال کے بارے میں بات کرتے ہوئے برطانوی وزیرِ اعظم کا یہ بھی کہنا تھا کہ بھوکے بچوں کی تصاویر ہمارے ساتھ ’زندگی بھر کے لیے رہیں گی۔‘
