وفاقی وزیر داخلہ محسن نقوی نے ایجنٹ مافیا کیخلاف بھرپور کریک ڈائون کا حکم دیتے ہوئے کہا ہے کہ ایجنٹ مافیا پیسوں کے لالچ میں معصوم لوگوں کے مستقبل سے کھیل، ملک کی بدنامی کا باعث بن رہا ہے، معصوم لوگوں کو ملازمت کا جھانسہ دے کر بیرون ممالک بھجوانے والے ایجنٹوں سے کوئی رعایت نہیں ہو گی۔
ہفتے کو وزیر داخلہ محسن نقوی نے اسلام آباد انٹرنیشنل ایئرپورٹ کا اچانک دورہ کیا اور امیگریشن پراسیس، عملے کی موجودگی، مسافروں کو درپیش مسائل کا تفصیلی جائزہ لیا، وزیر داخلہ نے بیرون ملک سفر کرنے والے مسافروں سے ملاقات کرکے تجربات اور شکایات بھی سنیں۔
وزیر داخلہ نے 7نومبر کو ایک مسافر کی جانب سے امیگریشن پر کم عملہ تعینات ہونے کی شکایت کا سخت نوٹس لیتے ہوئے فوری انکوائری کا حکم دیا اور ہدایت کی کہ سی سی ٹی وی فوٹیج کے ذریعے پوری صورتحال کا باریک بینی سے جائزہ لیا جائے، وزیر داخلہ نے یقین دلایا کہ آئندہ مسافروں کو اس نوعیت کی شکایت کا موقع نہیں ملے گا۔
انہوں نے ضروری سفری دستاویزات رکھنے والے مسافروں کو بلاجواز روکنے سے گریز کرنے کی ہدایت کرتے ہوئے کہا کہ جعلی دستاویزات یا غیر قانونی ذرائع سے سفر کرنیوالے مسافر ملک کی بدنامی کا سبب بنتے ہیں، ایسی صورتحال کسی صورت برداشت نہیں کی جائے گی۔
وزیر داخلہ نے ویزا ایجنٹ مافیا کیخلاف بھرپور کریک ڈائون کا حکم دیتے ہوئے کہا کہ ایجنٹ مافیا پیسوں کے لالچ میں معصوم لوگوں کے مستقبل سے کھیل رہا ہے، ملازمت کا جھانسہ دے کر بیرونِ ملک بھجوانے والے دھوکہ باز ایجنٹوں سے کوئی رعایت نہیں کی جائے گی۔
وزیر داخلہ نے ایئرپورٹ امیگریشن نظام کو مزید مور، شفاف اور مسافر دوست بنانے کی ہدایت کی ۔
