وزیراعظم شہباز شریف نے فلسطینیوں کے بنیادی حق خود ارادیت اور آزاد فلسطینی ریاست کیلئے پاکستان کی حمایت کا اعادہ کرتے ہوئے کہا ہے کہ غزہ سمیت فلسطینیوں کی سرزمین سے اسرائیل کا مکمل انخلا یقینی بنانا ناگزیر ہے، فلسطینیوں کے خلاف اسرائیل کے جنگی جرائم اور منظم نسل کشی کا عالمی قوانین کے مطابق مواخذہ ہونا چاہئے۔
عالمی یوم یکجہتی فلسطین پر جار ی بیان میں وزیراعظم نے کہا کہ حکومت پاکستان اور عوام غیر متزلزل عزم و یکجہتی کیساتھ فلسطینی بھائیوں اور بہنوں کیساتھ کھڑے ہیں، دہائیوں سے فلسطینی عوام نے المناک سانحات کا سامنا کیا ہے جن میں حق خود ارادیت کی نفی، اپنی سرزمین سے محرومی اور امن و سکون کی تباہی شامل ہیں۔
انہوں نے کہا کہ غزہ میں 70ہزار بچوں، خواتین اور مردوں کو شہید کر دیا گیا ہے،آبادیوں اور خاندانوں کو صفحہ ہستی سے مٹا دیا گیا ہے، اس کے علاوہ گھروں، ہسپتالوں، سکولوں اور بنیادی ضروری شہری ڈھانچے کو ملبے میں تبدیل کر دیا گیا ہے، ایسے افسوسناک اور ناقابل بیان سانحات کے باوجود فلسطینی عوام نے مثالی، غیر متزلزل اور بھرپور عزم و ہمت کا مظاہرہ کیا ہے اور اپنی شناخت اور مقصد کیلئے حصول انصاف کی امید کا دامن کبھی نہیں چھوڑا۔
انہوں نے کہا کہ فلسطینی عوام کی جرت و بہادری اور ان کی انصاف پسند مقاصد کے ساتھ وابستگی انسانی عزم کی عظمت کی عکاس ہے، فلسطینیوں کے خلاف اسرائیل کے جنگی جرائم اور منظم نسل کشی کا عالمی قوانین کے مطابق مواخذہ ہونا چاہئے۔
وزیراعظم نے کہا کہ دو ریاستی حل کیلئے بلائی گئی حالیہ اعلی سطحی کانفرنس اور غزہ امن منصوبہ کی صورت میں اس مسئلے کے حل کا ایک موقع ملا، تاہم جنگ بندی جاری رہنا اور اسرائیل کی طرف سے ہر قسم کے تشدد کی روک تھام اور انسانی امداد کی بلا تعطل فراہمی کو یقینی بنانا نہایت ضروری و ناگزیر ہے، اس کے علاوہ اقوام متحدہ کے فلسطینی مہاجرین کی امداد کیلئے سرگرم ادارے کو بغیر کسی سیاسی مداخلت اور رکاوٹ کے مکمل طور پر فعال بنانا ضروری ہے اور سب سے اہم اسرائیل کے فلسطینیوں کی سرزمین بشمول غزہ سے مکمل انخلا کو یقینی بنانا ناگزیر ہے کیونکہ فلسطینی عوام مکمل امن اور خوشحالی کے حقدار ہیں۔
وزیر اعظم نے کہا کہ دنیا کو غزہ میں ظلم و ستم کی مذمت کرنے کے ساتھ ساتھ مغربی کنارہ کی سنگین صورتحال پر بھی توجہ دینی چاہئے جہاں پر غیر قانونی بستیوں کی توسیع عالمی قوانین کی کھلی خلاف ورزی اور امن و سلامتی کیلئے بہت بڑی رکاوٹ ہے۔
انہوں نے کہا کہ پاکستان مسئلہ فلسطین کیلئے منصفانہ، دیر پا اور جامع حل کی بھرپور حمایت کرتا ہے جو اقوام متحدہ کی سلامتی کونسل اور جنرل اسمبلی کی متعلقہ قراردادوں کے مطابق ہو،پاکستان اپنے بھرپور تعاون اور فلسطینی عوام کے جائز حقوق کی مکمل حمایت کا اعادہ کرتا ہے۔
انہوں نے کہا کہ پاکستان، فلسطینیوں کے بنیادی حق، حق خود ارادیت اور ایک آزاد، قابل عمل، متحد فلسطینی ریاست کی حمایت کرتا ہے جو 1967 سے پہلے کی سرحدوں کی بنیاد پر قائم ہو اور القدس الشریف اس کا دارالحکومت ہو۔وزیر اعظم نے کہا کہ پاکستان آج کے دن بالخصوص اور ہمیشہ کیلئے فلسطینی عوام کے ساتھ اظہار یکجہتی کرتا ہے ،ہم منصفانہ، جائز ، آزادی، عزت و قار اور امن و خوشحالی کیلئے ان کی حق پر مبنی جدو جہد کے ساتھ ہیں۔
