جماعت اسلامی نے پنجاب بلدیاتی ایکٹ کو غیر جمہوری عوام کے شہری حقوق کا دشمن قرار دیتے ہوئے کہا ہے کہ پارلیمانی کارروائی میں اپوزیشن کا کردار اہم، احتجاج حق ہے۔
جاری بیان میں لیاقت بلوچ نے کہا کہ آکسفورڈ یونیورسٹی میں پاکستانی طلبہ کا مباحثہ میں بھارت سے جیت قابل فخر ہے، عالمی سطح پر پاکستانی نوجوانوں کی ایسی کامیابیاں ملک کیلئے مثبت تاثر اجاگر کرتی ہیں۔
انہوں نے کہا کہ بانی عمران خان سے جیل میں ملاقات پی ٹی آئی قیادت کا سیاسی و جمہوری حق ہے، جسے کسی صورت سلب نہیں کیا جانا چاہئے۔
انہوں نے کہا کہ پارلیمانی کارروائی میں اپوزیشن کا کردار اہم، احتجاج حق ہے۔
انہوں نے پنجاب بلدیاتی ایکٹ کو تنقید کا نشانہ بناتے ہوئے کہا کہ موجودہ ایکٹ غیر جمہوری ہے اور عوام کے بنیادی شہری حقوق کے منافی ہے۔
لیاقت بلوچ نے کہا کہ بااختیار، شفاف اور خود مختار بلدیاتی نظام ہی عوامی مسائل کے فوری اور دیرپا حل کی ضمانت دیتا ہے۔
