محکمہ داخلہ پنجاب نے قیدیوں کی ذہنی صحت کے علاج کیلئے جیلوں میں ماہرین نفسیات تعینات کردیئے۔محکمہ داخلہ پنجاب نے وزیراعلی مریم نوازکی ہدایت پر جیل ریفارمز ایجنڈا کے تحت پنجاب بھر کی جیلوں میں سینئر و جونیئر سائیکالوجسٹ تعینات کردیئے۔ جاری ایس او پیز کے مطابق جیل سائیکالوجسٹ ہر قیدی کے جرم، کریمنل ہسٹری اور شخصیت کے مطابق اس کی کیٹیگری کا تعین اور علاج کرے گا۔
یونیفارم پالیسی کے تحت کارکردگی جانچنے کیلئے ایس او پیز کے مطابق جیل آمد کے 24گھنٹوں میں سائیکالوجسٹ ہر قیدی کا معائنہ کریگا اورپھر اس کے مطابق اقدامات اٹھائے جائینگے۔بیان کے مطابق قیدیوں کو ذہنی تناؤ، خود کشی رجحانات سے بچاؤ کے علاوہ منشیات کے عادی یا نفسیاتی مسائل کے شکار قیدیوں کی بحالی کیلئے اقدامات اٹھائے جائیں گے۔
ایس او پیز کے تحت جیل سائیکالوجسٹس کو پیرول بورڈ کا ممبر بھی بنایا گیا جو قیدی کی پیرول پر رہائی کے حوالے سے رسک اسیسمنٹ رپورٹ دے گا۔پر تشدد رویئے کے حامل اسیران کی کاؤنسلنگ، ہر ماہ ہر قیدی کا معائنہ اور کاؤنسلنگ کی فائل اپڈیٹ کرنا اور ذہنی تنا ؤکے شکار قیدیوں سے بہتر روئیے کیلئے جیل عملے کی تربیت بھی سائیکالوجسٹ کے کام کا حصہ ہو گا۔
