صدر آصف زرداری نے فلسطینی عوام کے حق خود ارادیت کی غیرمتزلزل حمایت کا عزم کرتے ہوئے کہاہے کہ اسرائیلی دیدہ دلیری،مسلسل جارحیت خطے کے امن و استحکام کو خطرے میں ڈال رہی ہے، عالمی ضمیر لاکھوں لوگوں کی حالت زار نظر انداز نہیں کر سکتا،عالمی برادری فلسطینی عوام کی نسل کشی روکے، ظالمانہ اقدامات پر اسرائیل کو جوابدہ ٹھہرائے۔فلسطینیوں سے یکجہتی کے عالمی دن پر صدر آصف زرداری نے اپنے پیغام میں کہا ہے کہ پاکستان فلسطینی عوام کے حق خودارادیت کیلئے اپنی غیر متزلزل حمایت کا اعادہ کرتا ہے۔
انہوں نے کہا کہ پاکستان 1967سے قبل کی سرحدوں کے مطابق آزاد فلسطینی ریاست کا حامی ہے اور آزادی، وقار و انصاف کیلئے فلسطینیوں کی جائز جدوجہد میں ان کے شانہ بشانہ کھڑا ہے۔ انہوں نے عالمی ضمیر فلسطین میں لاکھوں لوگوں کی حالت زار نظر انداز نہیں کر سکتا،عالمی برادری فلسطینی عوام کی نسل کشی روکنے کیلئے فوری اقدامات کرے اور اسرائیل کو ظالمانہ اقدامات پر جوابدہ ٹھہرائے۔
انہوں نے کہا کہ امن کی راہ میں سب سے بڑی رکاوٹ اسرائیلی قبضہ اور عالمی قوانین کی مسلسل بے توقیری ہے،سلامتی کونسل و عالمی برادری غزہ میں فوری و غیر مشروط جنگ بندی کرائے۔صدر مملکت نے کہا کہ عالمی عدالت انصاف کا اسرائیلی اقدامات کو نسل کشی قرار دینا درست ہے، اسرائیل اقوام متحدہ اور دیگر امدادی ایجنسیوں کے کام میں رکاوٹ ڈال کر لاکھوں فلسطینیوں کو انسانی امداد سے محروم کر رہا ہے۔
انہوں نے کہا کہ گزشتہ سال اسرائیلی حملوں میں 45ہزار سے زائد فلسطینی اپنی جانیں کھو چکے، اسرائیلی دیدہ دلیری اور مسلسل جارحیت خطے کے امن و استحکام کو خطرے میں ڈال رہی ہے۔ انہوں نے کہا کہ فلسطینیوں کے ناقابل تنسیخ حق خودارادیت کے حصول کیلئے حمایت جاری رکھیں گے۔
