چیئرمین پی ٹی آئی بیرسٹر گوہر نے سینیٹ الیکشن رکوانے کی درخواست مسترد ہونے پر افسوس کا اظہار کرتے ہوئے کہا ہے کہ الیکشن کمیشن کے پاس چیئرمین سینیٹ کے ریفرنس کے بغیر نااہلی کا اختیار نہیں ہے، امید ہے ہائیکورٹ میں کیس چلے گا تو ریلیف ملے گا۔
سپریم کورٹ کے باہر میڈیا سے گفتگو کرتے ہوئے بیرسٹر گوہر نے کہا کہ آئینی بینچ کے سامنے شبلی فراز کی درخواست پر سماعت تھی، ہم نے الیکشن کمیشن کی جانب سے نااہلی کے نوٹیفکیشن کو چیلنج کیا تھا، مجھے افسوس ہے کل سینیٹ کا الیکشن ہو رہا ہے، ہم نے سینیٹ کا الیکشن رکوانے کیلئے درخواست بھی دی تھی۔
انہوں نے کہا کہ پشاور ہائیکورٹ میں سماعت ملتوی ہوئی تھی آج سپریم کورٹ نے کالعدم قرار دے دیا، ہائیکورٹ کو ڈائریکشن جاری کی گئی کہ دونوں فریقین کو سن کر فیصلہ کریں۔
انہوں نے کہا کہ عدالت نے کہا ہم مزید پیچیدگیوں میں نہیں جانا چاہتے، عدالت نے کہا اور بھی بہت سارے لوگوں کے نااہلی کے معاملات اس سے منسلک ہیں۔
انہوں نے کہا کہ امید ہے ہائیکورٹ میں کیس چلے گا تو ہمیں ریلیف ملے گا، الیکشن کمیشن کے پاس چیئرمین سینیٹ کے ریفرنس کے بغیر کسی کو نااہل کرنے کا اختیار نہیں ہے۔
