یورپی یونین نے کہا ہے کہ مشرق وسطی میں جو کچھ ہوا اس سے معلوم ہوتا ہے کہ ہم اپنی انسانیت کھو چکے ہیں، ہم ایک بڑی آگ کے دہانے پر ہیں، دوسری عالمی جنگ کے بعد شدید اورسنگین ترین انسانی بحران غزہ میں پیش آیا ہے،
غزہ اور لبنان میں جنگ ایک بڑی آگ کا باعث بنے گی۔ ان خیالات کا اظہاریورپی یونین کے نمائندہ اعلی برائے خارجہ امور اور سیکیورٹی پالیسی جوزف بوریل نے کیا۔ انہوں نے کہا کہ ہر کسی کو یہ خدشہ ہے کہ اسرائیل ایران کی جوہری یا تیل تنصیبات پر حملہ کرے گا،
انہوں نے مشرق وسطی میں تصادم کو روکنے کے لیے "مجبوری اقدامات کے نفاذ کی اپیل کی۔ انہوں نے کہاکہ یورپی یونین کا ہر ملک اسرائیل کو ہتھیاروں کی فروخت روکنے کے بارے میں اپنا فیصلہ خود کرے گا اور یہ کہ کوئی مشترکہ فیصلہ نہیں ہو گا۔ ہر ملک کس چیز کے مناسب ہونے کا فیصلہ کرتا ہے اور میں انہیں کوئی کام کرنے سے نہ تو روک سکتا ہوں اور نہ ہی کچھ اور کرنے کی سفارش کر سکتا ہوں۔
